“Dayanıqlı kənd təsərrüfatında toxumçuluğun rolu” mövzusunda konfrans keçirilib VİDEO
Bakı, 22 oktyabr, AZƏRTAC
Bakıda Kənd Təsərrüfatı Nazirliyi yanında Aqrar Xidmətlər Agentliyi və BMT-nin Ərzaq və Kənd Təsərrüfatı Təşkilatının (FAO) birgə təşkilatçılığı ilə “Dayanıqlı kənd təsərrüfatında toxumçuluğun rolu” mövzusunda konfrans keçirilib.
Nazirlikdən AZƏRTAC-a bildirilib ki, tədbirdə kənd təsərrüfatı naziri Məcnun Məmmədov, FAO-nun Azərbaycandakı nümayəndəsi Nasar Hayat, Kənd Təsərrüfatı Nazirliyinin məsul şəxsləri, Aqrar Xidmətlər Agentliyinin rəhbərliyi və əməkdaşları, elmi-tədqiqat institutlarının alimləri və toxumçu fermerlər iştirak ediblər.
Tədbirdə çıxış edən kənd təsərrüfatı naziri Məcnun Məmmədov bildirib ki, kənd təsərrüfatı məhsullarının istehsalında əsas istehsal vasitəsi kimi keyfiyyətli toxumlar xüsusi rol oynayır. Nazir qeyd edib ki, ərzaq təhlükəsizliyinin təmin olunmasının əsas prioritet istiqamətlərindən olan toxumçuluq sahəsində fəaliyyətin səmərəli təşkili, kənd təsərrüfatı bitkilərinin məhsuldarlığının və keyfiyyətinin yüksəldilməsinə əhəmiyyətli dərəcədə müsbət təsir göstərir.
Nazir Məcnun Məmmədov əlavə edib ki, dövlət tərəfindən həyata keçirilən dayanıqlı toxumçuluq siyasəti çərçivəsində Kənd Təsərrüfatı Nazirliyi tərəfindən seleksiya nailiyyətlərinin qeydiyyatı, toxum sertifikatlaşdırılması və toxum bazarının liberallaşdırılması istiqamətində zəruri tədbirlər həyata keçirilir.
“Ölkəmizdə elmi-tədqiqat institutları ilə özəl toxumçuluq təsərrüfatlarının sıx əməkdaşlıq etməsi, elm və istehsalat əlaqələrinin güclənməsi özəl sektorun yeni yaradılmış bitki sortlarına marağını artırır. Seleksiya nailiyyətlərinin qeydiyyatı və toxum sertifikatlaşdırılması proseslərinin institusional potensialının gücləndirilməsi istiqamətində FAO ilə birgə layihələr həyata keçirilir. Həmçinin toxumçuluğun normativ-hüquqi bazasının təkmilləşdirilməsi məqsədilə “Toxumçuluq haqqında” yeni qanun layihəsi hazırlanıb. Bu qanunun qəbul olunması ölkədə toxum istehsalının artmasına xidmət edəcək.
Ölkənin ərzaq təhlükəsizliyinin təmin olunması, məhsuldar, xəstəlik və zərərvericilərə qarşı davamlı yeni sort və hibridlərin yaradılmasından asılıdır. Bu işdə alimlərimizin üzərinə xüsusi vəzifələr düşür. Bu istiqamətdə özəl sektor nümayəndələrini alimlərlə birgə tədqiqat işlərində iştirak etməyə çağırıram”, - deyə nazir bildirib.
BMT-nin Ərzaq və Kənd Təsərrüfatı Təşkilatının (FAO) Azərbaycan Respublikasındakı nümayəndəsi Nasar Hayat çıxışında bildirib ki, dayanıqlı ərzaq sistemi keyfiyyətli toxumdan başlayır. O qeyd edib ki, bu gün tədqiqat, innovasiya və yüksək keyfiyyətli toxum istehsalına qoyulan investisiyalar sabahın məhsuldar və təhlükəsiz kənd təsərrüfatını formalaşdırır.
“FAO-nun qlobal ərzaq təhlükəsizliyinə sədaqətinin 80 illiyi qeyd olunduğu bir vaxtda bizim Azərbaycan hökuməti ilə əməkdaşlığımız toxumçuluq sahəsinin inkişafı, fermerlərin keyfiyyətli və sertifikatlaşdırılmış toxumlara çıxışının genişləndirilməsi və kənd yerlərində dayanıqlı inkişafın sürətləndirilməsi istiqamətlərində əhəmiyyətli nəticələr verməkdədir. Birgə icra olunan layihələr, heç kəsi kənarda qoymadan, ölkədə müasir və rəqabətqabiliyyətli toxumçuluq sektorunun formalaşdırılmasına töhfə verir və milli ərzaq təhlükəsizliyinin möhkəmləndirilməsinə xidmət edir”, – deyə Nasar Hayat vurğulayıb.
Daha sonra konfrans öz işini panel sessiyalarda davam etdirib. Sessiyalarda “Toxumçuluğun inkişafı sahəsində görülmüş işlər və mövcud problemlər”, “Yeni sortların yaradılması, yerli sortlara tələbat və təşviq”, “Toxumçuluğun inkişafında özəl sektorun rolu və dövlət dəstəyi” mövzularında təqdimatlar dinlənilib.
Müzakirələrdə toxumçuluğun elmi əsaslarla inkişaf etdirilməsi, ilkin toxumçuluğun təşkilində beynəlxalq təcrübədən istifadə və bu sahədə yeni innovativ texnologiyaların tətbiqi ilə bağlı fikir mübadiləsi aparılıb.
Tədbir çərçivəsində keyfiyyətli toxumun əhəmiyyəti və toxumçuluğun inkişafı ilə bağlı videoçarx nümayiş olunub, bu sahədə yüksək peşəkarlıq göstərən və aqrar sektorun inkişafına töhfə verən toxumçulara sertifikatlar təqdim edilib.
Bölmənin digər xəbərləri
