“Ümumi təhsildə keyfiyyətin yüksəldilməsi: təcrübələr və yeni yanaşmalar”- beynəlxalq konfrans VİDEO
Bakı, 9 dekabr, AZƏRTAC
Dekabrın 9-da Azərbaycan Respublikasının Təhsil İnstitutunun təşkilatçılığı ilə “Ümumi təhsildə keyfiyyətin yüksəldilməsi: təcrübələr və yeni yanaşmalar” mövzusunda beynəlxalq elmi-praktik konfrans keçirilib.
Tədbirdə Dövlət Himni səsləndirilib, torpaqlarımızın azadlığı uğrunda şəhid olmuş qəhrəmanlarımızın əziz xatirəsi bir dəqiqəlik sükutla yad edilib.
AZƏRTAC xəbər verir ki, elm və təhsil nazirinin müavini Kənan Kərimzadə açılış nitqi ilə çıxış edərək ümumi təhsildə keyfiyyətin artırılmasının dövlətin uzunmüddətli inkişaf strategiyasındakı mühüm rolundan danışıb. Nazir müavinin sözlərinə görə, məqsədyönlü və məntiqli şəkildə icra olunan islahatlar Azərbaycan təhsilini yeni və yüksək transformasiya mərhələsinə hazırlayıb. Görülən işlərin nəticəsində 1,3 milyondan çox şagirdin təlim və təhsil şəraiti yaxşılaşdırılıb. Eyni zamanda, son illərdə təhsil sistemi üçün vacib olan mühüm strategiyalar və dövlət proqramları qəbul olunub.
Konfransda London Universitet Kollecinin (UCL) Təhsil liderliyi və idarə edilməsi üzrə dosenti Devid Qodfrey “Peşəkar inkişaf və məktəb inkişafı üçün birgə öyrənmə” mövzusunda çıxış edib.
Təhsil İnstitutunun direktoru vəzifəsini müvəqqəti icra edən, elm və təhsil nazirinin müşaviri Elnur Əliyev isə “Metodik dəstək – keyfiyyətin yüksəldilməsi aləti kimi” mövzusunda təqdimatla çıxış edərək yeni metodik dəstək modelinin mahiyyəti və təhsil müəssisələrində metodik dəstək mexanizmlərinin gücləndirilməsinin əhəmiyyəti barədə danışıb.
Beynəlxalq ekspert, Məktəb İnspektorluqlarının Daimi Konfransının (SİCİ) inkişaf üzrə rəhbəri Erik De Bou isə “İnspeksiya prosesində aydın çərçivə və inkişafyönümlü ünsiyyətin məktəb fəaliyyətinin obyektiv dəyərləndirilməsinə və məktəb inkişafına verdiyi töhfə” mövzusunda məruzə təqdim edib. Növbəti məruzəçi məktəb inspeksiyasında akademik rəhbər - Aysel Əzimova “Azərbaycanda məktəb liderliyi praktikalarının formalaşmasında keyfiyyət monitorinqlərinin rolu “mövzusunda çıxış edib.
Tədbir yerli və xarici məruzəçilərinin panel müzakirələri və vörkşoplarla davam edib.
Tədbir çərçivəsində “Məktəblərdə keyfiyyət mədəniyyətinin formalaşdırılması” və “Məktəblərdə dayanıqlı və real inkişaf strategiyaları” adlı panel müzakirələr, “Məktəblərarası əməkdaşlıqda birgə öyrənmə və inkişaf yanaşmaları”, “Tədrisin keyfiyyətinin yüksəldilməsi məqsədilə milli qiymətləndirmə nəticələrindən istifadə” adlı vörkşoplar keçirilib. Vörkşoplarda iştirakçılar interaktiv tapşırıqlar vasitəsilə mövzular üzrə real yanaşmaları müzakirə etmək imkanı əldə ediblər.
Vörkşop və seminar formatında təşkil olunan bu sessiyalarda iştirakçılar məktəblərarası əməkdaşlıqda birgə öyrənmə, inkişafyönümlü ünsiyyət və motivasiya, eləcə də milli qiymətləndirmə nəticələrindən istifadəyə dair praktik müzakirələr aparıblar. İştirakçılar interaktiv tapşırıqlar vasitəsilə mövzular üzrə real yanaşmaları müzakirə etmək imkanı əldə ediblər.
Qeyd edək ki, konfransın keçirilməsində əsas məqsəd ümumi təhsil sistemində keyfiyyətin artırılması istiqamətində həyata keçirilən islahatların, beynəlxalq təcrübələrin və yeni yanaşmaların müzakirəsi, həmçinin məktəb liderləri, inspektorlar və təhsil mütəxəssisləri arasında peşəkar dialoqun gücləndirilməsi olub.
Bölmənin digər xəbərləri
