Ağdam şəhərindəki 5-ci yaşayış kompleksində 1074 mənzil inşa olunur VİDEO
Ağdam, 16 fevral, Tahir Ağaməmmədov, AZƏRTAC
Ağdam şəhərində aparılan bərpa-quruculuq işləri çərçivəsində 5-ci yaşayış kompleksinin tikintisi davam etdirilir. Layihəyə uyğun olaraq, yaşayış kompleksində 50 binanın inşası nəzərdə tutulur.
Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin İctimaiyyətlə əlaqələr şöbəsinin əməkdaşı Fidan Məmmədli AZƏRTAC-ın bölgə müxbirinə bildirib ki, artıq 2-ci yaşayış kompleksinə sakinlərin köçü təmin olunub. Bu yaşayış kompleksində 103 ailə olmaqla, 403 ailə yaşayır. Ağdam şəhərindəki digər yaşayış kompleksində də işlər davam edir.
5-ci yaşayış kompleksində isə 50 binanın inşası nəzərdə tutulur. Onlardan 40-ı çoxmənzilli yaşayış binası, 10-u qeyri-yaşayış binalarıdır. Bu yaşayış kompleksi 12 məhəllədən ibarət olacaq. Ümumilikdə 1074 mənzilin inşası planlaşdırılır.
F.Məmmədli qeyd edib ki, yaxın vaxtlarda 3-cü yaşayış kompleksində də tikinti işlərinə başlanılması nəzərdə tutulur. 3-cü yaşayış kompleksi 13 məhəllədən ibarət olacaq.
Ağdam şəhərində digər yeniliklərdən də danışan Fidan Məmmədli deyib: “Ağdam Cümə məscidi Heydər Əliyev Fondu tərəfindən bərpa olunub. Məscidin yardımçı tikililəri Ağdam, Füzuli və Xocavənd rayonlarında Bərpa, Tikinti və İdarəetmə Xidməti tərəfindən inşa ediləcək və tikintiyə yaxın vaxtlarda başlanılacaq. Eyni zamanda, Ağdam şəhərində çoxfunksiyalı inzibati binanın da tikintisinə yaxın vaxtlarda başlanması nəzərdə tutulur”.
128-129-cu məhəllələrin layihə rəhbəri Nəbi Mansurov 5-ci yaşayış kompleksinə aid bu yaşayış məkanlarında aparılan tikinti işlərinin cari vəziyyəti barədə məlumat verib: “Hazırda 128-ci məhəllədə bünövrənin armaturlanması prosesi icra olunur. Paralel olaraq, 129-cu məhəllədə mərtəbələr üzrə dəmir-qəlib və beton işləri sürətlə davam etdirilir, eyni zamanda, hörgü işlərinə start verilib”.
O qeyd edib ki, kompleksin ərazisində sakinlərin rahatlığını təmin etmək məqsədilə ən müasir standartlara cavab verən yeraltı və yerüstü avtoparklar istifadəyə veriləcək. Bu, həm məhəllədaxili yollarda avtomobil sıxlığının azalmasına, həm də estetik görünüşün qorunmasına şərait yaradacaq.
Nəbi Mansurovun sözlərinə görə, layihədə ekoloji təmiz nəqliyyata üstünlük verənlər də unudulmayıb. Belə ki, ərazidə xüsusi velosiped dayanacaqları və zolaqları nəzərdə tutulub. Layihə rəhbəri vurğulayıb ki, bütün bu infrastruktur həlləri təkcə parklanma problemini həll etməyəcək, həm də piyadaların təhlükəsizliyinə və ekoloji mühitin yaxşılaşdırılmasına öz töhfəsini verəcək.
135-ci məhəllə üzrə layihə rəhbəri Telman Paşşanov isə deyib: “135-ci məhəllədə 2 ədəd altımərtəbəli, 1 ədəd səkkizmərtəbəli bina inşa olunur. Mənzillər 2, 3 və 4 otaqlıdır. Yeraltı avtodayanacaq və zirzəmiləri bir-birinə bağlayan yeraltı qalereya olacaq. Hazırda binaların yeraltı konstruksiya hissəsi tamamlanıb, 3-cü mərtəbələrin işləri yekunlaşır. Həmçinin yerüstü avtodayanacaq, kiçik stadion və binalararası yolların inşası nəzərdə tutulur. Konstruksiya işlərinin may ayında yekunlaşması planlaşdırılır. Hazırda konstruksiya işləri ilə yanaşı, hörgü və mühəndis-kommunikasiya işləri də davam edir”.
Bölmənin digər xəbərləri
