ADU-da Azərbaycan-Çin diplomatik münasibətlərinin 34-cü ildönümü qeyd olunub VİDEO
Bakı, 1 aprel, AZƏRTAC
Aprelin 1-də Azərbaycan Dillər Universitetində (ADU) “Azərbaycan Respublikası və Çin Xalq Respublikası arasında diplomatik münasibətlərin qurulmasının 34-cü ildönümü” mövzusunda seminar keçirilib. Əvvəlcə hər iki ölkənin Dövlət himnləri səsləndirilib.
AZƏRTAC xəbər verir ki, tədbiri Konfutsi İnstitutunun direktoru Rafiq Abbasov açaraq iki ölkə arasında əlaqələrin son illərdə dinamik inkişaf etdiyini vurğulayıb. O, humanitar və təhsil sahəsində əməkdaşlığın genişlənməsinin əhəmiyyətini qeyd edib.
ADU-nun rektoru akademik Kamal Abdulla Çinə olan maraq və rəğbətin gənclər arasında artdığını söyləyib. Rektor bildirib ki, ADU-da zəngin Çin folkloruna maraq təkcə Konfutsi İnstitutu ilə məhdudlaşmır, digər auditoriyalarda da bu mövzuya geniş yer verilir. Akademik diqqətə çatdırıb ki, Biləsuvarda Mübariz İbrahimov adına məktəb-lisey kompleksində şagirdlərin təşəbbüsü ilə Çin dili tədrisinə başlanılması planlaşdırılır.
Rektor əlavə edib ki, universitetdə Çinin zəngin ədəbi irsini öyrənmək istəyən yüzlərlə tələbə və müəllim var. Bu səbəbdən ADU Çin dili üzrə ixtisaslaşmış müəllimlərin cəlb olunmasına və əməkdaşlığın genişləndirilməsinə hazırdır. Aprelin 20-də ADU-da Çin dili günü keçiriləcək. Tədbir çərçivəsində Çin musiqisi səsləndiriləcək, milli mətbəx nümunələri təqdim olunacaq. Kamal Abdulla vurğulayıb ki, bu gün Çinin Xudjou Universitetində Azərbaycan Dili Mərkəzinin açılışı baş tutub və bu təşəbbüs iki ölkə arasında mövcud ehtiyacların ödənilməsinə töhfə verəcək. Rektor Çinin dünya siyasətində artan rolunu yüksək qiymətləndirərək deyib ki, Çin hər zaman Azərbaycanın haqq səsini dəstəkləyib və bu, qürur doğurur.
Çin Xalq Respublikasının Azərbaycandakı səfiri Lu Mey iki ölkə arasında münasibətlərin dinamik inkişafını qoruyub saxladığını, böyük və kiçik ölkələr arasında bərabərhüquqlu münasibətlərin və dostluğun nümunəsinə çevrildiyini söyləyib. Səfir qeyd edib ki, iki ölkə liderinin rəhbərliyi altında Çin və Azərbaycan hərtərəfli strateji tərəfdaşlıq münasibətləri quraraq ikitərəfli əlaqələrdə yeni mərhələyə qədəm qoyublar.
Səfir qeyd edib ki, Azərbaycanda Çin dilini öyrənən tələbələrin sayı 8000-i ötüb. Çinin Pekin Universiteti, Tsinhua Universiteti və Çin Sosial Elmlər Akademiyası kimi beyin mərkəzləri Azərbaycanla bağlı tədqiqatlarla fəal şəkildə məşğul olur. Pekin Xarici Dillər Universitetində 2015-ci ildən Azərbaycan dili ixtisası yaradılıb.
Lu Mey Çin ilə Azərbaycan arasında hərtərəfli strateji tərəfdaşlığın geniş perspektivlər və böyük imkanlar açdığını vurğulayıb.
Daha sonra Çində yerləşən Xudjou Universitetinin təbrik məktubu səsləndirilib.
Seminarda Şərq ölkələri üzrə Regionşünaslıq kafedrasının dosenti Rəna Rəcəbli və baş müəllimi Fidan Ələsgərova Azərbaycan-Çin münasibətlərinin tarixi inkişaf mərhələləri, bu əməkdaşlığın regional və qlobal əhəmiyyəti barədə fikirlərini bölüşüblər.
Sonda mövzu ətrafında fikir mübadiləsi aparılıb, iştirakçıların sualları cavablandırılıb.
Bölmənin digər xəbərləri
