Azərbaycan və Özbəkistan arasında idman sahəsində əməkdaşlıq: Əsas istiqamətlər və perspektivlər
Bakı, 23 avqust, AZƏRTAC
Azərbaycan və Özbəkistan arasında münasibətlər son illərdə təkcə siyasi, iqtisadi və mədəni əlaqələrlə məhdudlaşmır, həm də idman sahəsində yeni təşəbbüslər, birgə layihələr və beynəlxalq yarışların təşkili istiqamətində sürətlə inkişaf edir. 2021-ci ildə Daşkənddə Azərbaycanın və Özbəkistanın Milli Olimpiya komitələri arasında memorandum, 2023-cü ildə isə Bakıda Azərbaycanın Gənclər və İdman Nazirliyi ilə Özbəkistanın Gənclər Siyasəti və İdman Nazirliyi arasında gənclər siyasəti və idman sahələrində əməkdaşlıq haqqında saziş imzalanıb. Hər iki saziş birgə yarışların təşkili, təlim-məşq toplanışları, məşqçi və mütəxəssis mübadiləsi, eləcə də gənclər proqramlarının həyata keçirilməsini nəzərdə tutur.
Son illərin ən əhəmiyyətli hadisələrindən biri Azərbaycan və Özbəkistanın 2027-ci ildə keçiriləcək FIFA U-20 dünya çempionatına birgə ev sahibliyi etmək hüququ qazanmasıdır. FIFA-nın bu qərarı hər iki ölkənin idman infrastrukturu, təşkilatçılıq bacarığı və beynəlxalq əməkdaşlıq potensialına verilən yüksək qiymət kimi dəyərləndirilir. Bu turnir FIFA tarixində gənclər arasında dünya çempionatının ilk dəfə iki ölkə tərəfindən birgə təşkil olunması baxımından da xüsusi əhəmiyyət daşıyır.
Layihə çərçivəsində stadionların və məşq bazalarının təkmilləşdirilməsi, könüllülərin hazırlanması, logistika və marketinq sahələrində təcrübə mübadiləsi həyata keçirilir. Eyni zamanda turnirin hər iki ölkədə idman turizminin inkişafına və beynəlxalq tanıtıma mühüm töhfə verəcəyi gözlənilir.
U-20 dünya çempionatının birgə təşkili iki ölkə arasında idman əməkdaşlığını yeni mərhələyə yüksəldəcək.
İdman qurumları arasında əməkdaşlıq
Azərbaycan və Özbəkistanın gənclər və idman qurumları arasında əlaqələr son illərdə daha da intensivləşib. Rəsmi nümayəndə heyətlərinin qarşılıqlı səfərləri, beynəlxalq forumlarda birgə iştirak və müxtəlif idman növləri üzrə təcrübə mübadiləsi əməkdaşlığın əsas istiqamətlərini təşkil edir.
Bu il iki ölkənin Stolüstü Tennis federasiyaları arasında Anlaşma Memorandumu imzalanıb. Memorandum idmançıların hazırlanması, məşqçi və hakimlərin təlimi, idman tibbi və rəqəmsal idarəetmə sahələrində əməkdaşlığın genişləndirilməsi və birgə yarışların təşkilini əhatə edir.
Azərbaycan Milli Antidopinq Agentliyi (AMADA) ilə Özbəkistan Milli Antidopinq Agentliyi (UzNADA) arasında imzalanmış memorandum isə dopinq nəzarəti, idmançıların bioloji pasportu, təhsil proqramları və beynəlxalq yarışlarda əməkdaşlığın gücləndirilməsini nəzərdə tutur.
Bu əlaqələr hər iki ölkənin idman sisteminin inkişafına və beynəlxalq standartlara uyğunlaşmasına xidmət edir.
İdmançılar və federasiyalar arasında əlaqələr
Azərbaycan və Özbəkistan idmançıları cüdo, güləş, boks, taekvondo, gimnastika və digər növlər üzrə beynəlxalq turnirlərdə mütəmadi olaraq qarşılaşır və birgə təlim-məşq toplanışlarında iştirak edirlər. Federasiyalar arasında əməkdaşlıq memorandumlarının imzalanması, hakim və məşqçilər üçün seminarların təşkili, eləcə də gənc idmançıların qarşılıqlı təcrübə proqramları bu əməkdaşlığı daha da gücləndirir. Bundan əlavə, hər iki ölkənin idman mütəxəssisləri beynəlxalq federasiyaların tədbirlərində birgə fəaliyyət göstərərək regional əməkdaşlığın inkişafına töhfə verirlər.
İdman əməkdaşlığı yalnız peşəkar yarışlarla məhdudlaşmır. Gənclər düşərgələri, tələbə idman festivalları, məktəblilər arasında yarışlar və müxtəlif beynəlxalq tədbirlər Azərbaycan ilə Özbəkistan arasında humanitar əlaqələrin möhkəmlənməsinə xidmət edir. Bu layihələr vasitəsilə gənclər arasında dostluq münasibətləri formalaşır, sağlam həyat tərzi təşviq olunur və Türk dünyasının ortaq dəyərləri təbliğ edilir.
Perspektivlər
Gələcəkdə iki ölkə arasında Olimpiya idman növləri üzrə birgə hazırlıq proqramlarının təşkili, gənclər və yeniyetmələr üçün beynəlxalq təlim düşərgələrinin keçirilməsi, idman elmi, idman tibbi və rəqəmsal texnologiyalar sahəsində təcrübə mübadiləsi, regional və beynəlxalq idman yarışlarının birgə təşkili, idman turizmi və idman infrastrukturunun inkişafı üzrə ortaq layihələrin həyata keçirilməsi üzrə əməkdaşlığın genişlənəcəyi gözlənilir.
Bölmənin digər xəbərləri
