Sahib Paşazadə: Azərbaycan-Özbəkistan mədəni əlaqələri yeni layihələrlə daha da genişlənir
Bakı, 23 avqust, AZƏRTAC
Azərbaycan və Özbəkistan arasında əsrlər boyu formalaşmış tarixi, mənəvi və mədəni bağlar bu gün də uğurla inkişaf etdirilir. Xüsusilə mədəni-humanitar sahədə həyata keçirilən qarşılıqlı layihələr, mədəniyyət günləri, yaradıcılıq və elmi mübadilələr iki qardaş ölkənin əlaqələrinin daha da möhkəmlənməsinə mühüm töhfə verir.
Bu fikirləri AZƏRTAC-a açıqlamasında Beynəlxalq Muğam Mərkəzinin direktoru, Əməkdar artist, tarzən, Özbəkistanın mədəniyyət səfiri Sahib Paşazadə deyib.
O vurğulayıb ki, Azərbaycan və Özbəkistan arasında hər iki dövlətin liderləri səviyyəsində formalaşan yüksəksəviyyəli münasibətlər mədəniyyət və incəsənət sahəsində əməkdaşlığın genişlənməsi üçün də əlverişli zəmin yaradıb. Azərbaycan Prezidenti İlham Əliyevin Özbəkistana səfəri və Özbəkistan Prezidenti Şavkat Mirziyoyevlə keçirdiyi görüşlər ikitərəfli münasibətlərin inkişafında mühüm əhəmiyyət daşıyır.
Sahib Paşazadə təhsil sahəsində əməkdaşlığın da uğurla inkişaf etdiyini diqqətə çatdırıb. O bildirib ki, qarşılıqlı tələbə mübadiləsi və təhsil müəssisələri arasında qurulan əlaqələr iki ölkənin gənc nəslinin bir-birinin mədəniyyəti və musiqi irsi ilə daha yaxından tanış olmasına imkan yaradır. Füzulidə Özbəkistanın təşəbbüsü ilə inşa edilən Mirzə Uluqbəy adına məktəb də iki ölkə arasındakı dostluğun mühüm nümunələrindən biridir.
Sahib Paşazadə qeyd edib ki, Beynəlxalq Muğam Mərkəzinin Özbəkistanın aparıcı ali təhsil və mədəniyyət müəssisələri ilə imzaladığı əməkdaşlıq memorandumları əlaqələrin institusional əsasda inkişafına geniş imkanlar yaradır: “Bu memorandumlar çərçivəsində tələbə və müəllim mübadiləsinin, birgə elmi tədqiqatların, ustad dərslərinin, konsertlərin və müxtəlif mədəni layihələrin həyata keçirilməsini nəzərdə tuturuq. Həmçinin Özbəkistana səfərlərimiz çərçivəsində Mədəniyyət Nazirliyi, Özbək Milli Makom Sənəti Mərkəzi, Yunus Rəcəbi adına Özbək Milli Musiqi Sənəti İnstitutu, Özbəkistan Dövlət Konservatoriyası və digər aparıcı mədəniyyət və təhsil müəssisələri ilə görüşlər keçirmişik. Bu görüşlər zamanı milli musiqimizin təbliği, təhsil və elmi əməkdaşlığın genişləndirilməsi, birgə layihələrin həyata keçirilməsi ilə bağlı mühüm müzakirələr aparılıb”, - deyə Sahib Paşazadə qeyd edib.
O bildirib ki, Azərbaycan-Özbəkistan münasibətlərində mədəni-humanitar əməkdaşlıq xüsusi yer tutur. Tarzənin sözlərinə görə, son illərdə qarşılıqlı mədəniyyət günlərinin keçirilməsi bu əlaqələrin daha da inkişafına mühüm töhfə verib: “2023-cü və 2025-ci illərdə Azərbaycanda Özbəkistan mədəniyyət günlərinin, 2024-cü ildə isə Özbəkistanda Azərbaycan mədəniyyət günlərinin keçirilməsi xalqlarımızın bir-birinin zəngin mədəni irsi ilə daha yaxından tanış olmasına imkan yaradıb. Xivədə keçirilən “Şuşa günləri” də bu baxımdan mühüm hadisə olub”, – deyə Sahib Paşazadə qeyd edib.
Özbəkistanın mədəniyyət səfiri əlavə edib ki, iki ölkə arasında möhkəm dostluq və qardaşlıq münasibətləri bundan sonra da bütün sahələrdə əməkdaşlığın inkişafı üçün möhkəm əsas olacaq.
Müxbir - Gülay Nəzərova
Bölmənin digər xəbərləri
