Xocavəndli məcburi köçkünlər Dünya Azərbaycanlılarının Həmrəylik Gününü və Yeni il bayramını qeyd etmişlər
Beyləqan, 30 dekabr (AZƏRTAC). Beyləqan rayonu ərazisində salınmış “Yeni Xocavənd” qəsəbəsində məskunlaşmış xocavəndli məcburi köçkünlər 31 dekabr - Dünya Azərbaycanlılarının Həmrəylik Gününü və Yeni il bayramını qeyd etmişlər.
Dekabrın 29-da Xocavənd rayonu ərazisində yerləşən N saylı hərbi hissədə rayon ictimaiyyətinin, ön xətdə xidmət edən əsgər və zabitlərin iştirakı ilə bayram şənliyi keçirilmişdir. Xocavənd Rayon İcra Hakimiyyəti başçısının müavini Rəfael Mustafayev və rayon ictimaiyyətinin nümayəndələri əsgər və zabitləri bayram münasibətilə təbrik etmiş, onlara Vətənə xidmətdə uğurlar arzulamışlar.
Bir qrup nümunəvi əsgərə qiymətli hədiyyələr, hərbi hissənin şəxsi heyətinə bayram sovqatı verilmişdir.
Tədbir rayon mədəniyyət və turizm şöbəsinin bədii özfəaliyyət kollektivlərinin ifasında bayram konserti ilə davam etmişdir.
Dekabrın 30-da “Yeni Xocavənd” qəsəbəsindəki mədəniyyət evində geniş bayram tədbiri keçirilmişdir. Tədbirdə çalışdıqları sahələrdə əldə etdikləri uğurlara və nümunəvi fəaliyyətlərinə görə, bir qrup xocavəndliyə rayon icra hakimiyyətinin diplom, fəxri fərman və qiymətli hədiyyələri verilmişdir.
İncəsənət ustalarının rəngarəng konsert proqramı, Şaxta baba və Qar qızın çıxışları tədbir iştirakçılarına xoş ovqat bəxş etmişdir.
Bölmənin digər xəbərləri
