Respublika Uşaq Kitabxanasında “Kitabxana: nağıl qəhrəmanlarının görüş yeri” mövzusunda tədbir keçiriləcəkdir
Bakı, 11 fevral (AZƏRTAC) Fevralın 14-də F.Köçərli adına Respublika Uşaq Kitabxanasında Litvanın dövlət müstəqilliyi gününə həsr olunan “Kitabxana: nağıl qəhrəmanlarının görüş yeri” mövzusunda tədbir keçiriləcəkdir.
Kitabxanadan AZƏRTAC-a bildirmişlər ki, tədbirdə nağıl qəhrəmanlarımızdan olan Cırtdan, Göyçək Fatma, Tıq-tıq xanım, Məlikməmməd, Siçan bəy, Təpəgöz Litva xalqının nağıl qəhrəmanları - Kastitis, Yurate, Eqle ilə görüşəcəklər.
Bakıdakı 7 nömrəli məktəbin VII sinif şagirdlərinin iştirakı ilə baş tutacaq tədbir çox maraqlı keçəcəkdir. İştirakçılar slaydlara baxacaq, milli geyimdə olan uşaqlar Litva folklorundan tapmacalar söyləyəcək, nağıllardan səhnəciklər göstərəcəklər.
Tədbir çərçivəsində Litvanın adət-ənənələrindən, mədəniyyətindən bəhs edən uşaq kitablarının sərgisi də nümayiş olunacaqdır.
Azərbaycan-Litva dostluğunu təmsil edən tədbirdə Litvanın ölkəmizdəki səfirliyinin, Azərbaycan Respublikası Mədəniyyət və Turizm Nazirliyinin nümayəndələri, uşaq şair və yazıçıları iştirak edəcəklər.
Bölmənin digər xəbərləri
