Vətən müharibəsi qazisi: Şuşanın hər daşı tariximizin bir parçasıdır
Bakı, 6 sentyabr, AZƏRTAC
Şuşa kimi tarixi və mədəni əhəmiyyət daşıyan bir şəhərdə qaya və tarixi daşların üzərinə yazı yazmaq yolverilməzdir. Şuşanın hər daşı, divarı və abidəsi tariximizin bir parçasıdır və onları qorumaq hər birimizin məsuliyyətidir.
Bunu AZƏRTAC-a açıqlamasında Vətən müharibəsi qazisi, ehtiyatda olan baş leytenant Turan Məmmədzadə deyib. O qeyd edib ki, Vətən sevgisini göstərməyin yolu tarixi irsimizə zərər vurmaq deyil, onu qoruyaraq gələcək nəsillərə çatdırmaqdır.
“Əgər vətən sevgimizi, sevincimizi və Şuşa ilə bağlı xatirələrimizi ifadə etmək istəyiriksə, bunun üçün tarixi daşlara və qayalara zərər vermək olmaz. Düşünürəm ki, bu cür hissləri ifadə etməyin daha doğru və mədəni yolları var. Bunun üçün xüsusi ayrılmış lövhələrdən, fotoşəkillərdən və müasir rəqəmsal platformalardan istifadə etmək mümkündür”, - deyə Turan Məmmədzadə əlavə edib.
Bölmənin digər xəbərləri
