7 MAY
2012-ci il. “Baku Crystal Hall” istifadəyə verilib. “Eurovision-2012” mahnı müsabiqəsi burada keçirilib.
“Baku Crystal Hall” "ALPINE Bau Deutschland AG" şirkəti tərəfindən tikilib. Əsasən yığma metal konstruksiyadan istifadə olunmaqla tikilən bina Bakının ən güclü küləyinə belə davamlıdır.
1880-ci il. Xalq Rəssamı, Azərbaycan karikatura sənətinin banisi Əzim Əzimzadənin doğum günü (1880-1943). Karikaturaları “Molla Nəsrəddin”, “Baraban”, “Zənbur”, “Tuti”, “Kəlniyyət” və digər jurnallarda dərc olunub. M.Ə.Sabirin “Hophopnamə”sinə çəkdiyi illüstrasiyalarla kitab qrafikası sənətinin əsasını qoyub. Əsərləri dünyanın bir sıra muzeylərində nümayiş etdirilən rəssamın ilk fərdi sərgisi 1940-cı ildə təşkil edilib. Bakıda keçirilən bu sərgidə rəssamın 1200-dən çox əsəri yer alıb.
1861-ci il. Hind yazıçısı, şair, bəstəkar, rəssam və ictimai xadim, Asiya qitəsinin ilk Nobel mükafatı laureatı Rabindranat Taqorun doğum günü (1861-1941). Nobel mükafatı ona “poetik təfəkkürünün müstəsna bir ustalıqla əks edildiyi və Qərb ədəbiyyatının bir hissəsinə çevrilən gözəl, orijinal, hissiyyat dərinliyi ilə seçilən şeirlərinə görə” verilib. “Gitancali” kitabına daхil olan şeirləri, “Fəlakət” romanı və bir sıra nəsr əsərləri Azərbaycan dilinə tərcümə olunub.
1840-cı il. Dahi rus bəstəkarı Pyotr İliç Çaykovski anadan olub (1840-1893). “Qaratoxmaq qadın”, “Yevgeni Onegin”, “Dəmirçi Vakula”, “Orlean qızı”, ”Mazepa”, “Cadugar”, “İolanta”, “Çəkmələr” operalarının, “Qu gölü”, “Şelkunçik”, “Yatmış gözəl” baletlərinin müəllifidir. O, 20-dən çox simfonik əsər, “İlin fəsilləri” və “Uşaq albomu”nun da daxil olduğu fortepiano üçün əsərlər də bəstələyib. Moskva Konservatoriyasına P.Çaykovskinin adı verilib.
