Bakı, 27 avqust, AZƏRTAC

Avqustun 27-də futbol üzrə UEFA Avropa Liqası yarışlarında pley-off mərhələsinin cavab oyunları çərçivəsində Azərbaycan çempionu, Ağdamın “Qarabağ” komandası İsveçrənin “Yanq Boyz” kollektivini 3:0 hesabı ilə məğlubiyyətə uğradaraq UEFA Avropa Liqasının qrup mərhələsinə yüksəlib.

AZƏRTAC xəbər verir ki, Tofiq Bəhramov adına Respublika stadionun keçirilən qarşılaşmada Ağdam təmsilçisinin qollarını 4-cü dəqiqədə Riçard Almeyda (11 metrlik cərimə zərbəsindən) və 43-cü dəqiqədə Reynaldo vurublar.

“Qarabağ” Berndə oynanılan ilk görüşdə də Riçard Almeydanın qolu ilə 1:0 qalib gəldiyindən avroliqanın qrup mərhələsinə vəsiqəni iki qələbə ilə təmin edib.

Matçın əsas hakimi litvalı Qedminas Majeyka olub. Ona həmyerliləri Vytautas Simkus və Vitenis Kazlauskas kömək ediblər. Dördüncü hakim funksiyasını isə Sergey Sliva yerinə yetirib.

İsveçrəlilər erkən qol vurmaq üçün ilk dəqiqələrdən təşəbbüsü ələ almağa çalışsa da, hesabı Ağdam təmsilçiləri açıblar. Oyunun 3-cü dəqiqəsində Reynaldoya qarşı kobudluğa görə “Yanq Boyz” komandasının qapısına 11 metrlik cərimə zərbəsi təyin edilib. Zərbəni dəqiq yerinə yetirən Riçard Almeyda “Qarabağ”ı hesabda irəli çıxarıb - 1:0. Almeydaya qarşı kobud oyuna görə rəqib komandanın futbolçusu Steve von Bergen qırmızı vərəqə ilə cəzalandırılaraq meydandan qovulub.

Qoldan sonra hücumlarını daha da artıran “Qarabağ” futbolçuları ardıcıl olaraq bir neçə təhlükəli vəziyyət yaradıblar. Qarşılaşmanın 12-ci dəqiqəsində ağdamlılar gözəl kombinasiya nəticəsində real qol imkanı yaratsalar da, Riçard Almeydanın zərbəsi dəqiq olmayıb. Matçın 19-cu dəqiqəsində isə rəqib qapıçı ilə təkbətək qalan Reynaldo topu onun başı üzərindən tora göndərmək istəsə də, zərbəsi dəqiq olmayıb. Altı dəqiqə sonra Reynaldonun sağ cinahdan başlatdığı hücumu isveçrəli müdafiəçilər dəf ediblər. Görüşün 27-ci dəqiqəsində Riçard Almeydanın gözəl ötürməsini Dani Kintana güclü zərbə ilə tamamlasa da, son anda qapıçı topu meydandan çıxarıb.

“Qarabağ”ın tam üstünlüyü ilə keçən qarşılaşmanın 33-cü dəqiqəsində Reynaldonun güclü zərbəsinin qarşısını müdafiəçilər kəsiblər. İki dəqiqə sonra qapıçı ilə təkbətək qalan Reynaldo ikinci qola yaxın olsa da, uğur qazana bilməyib. Lakin oyunda fəallığı ilə seçilən Reynaldo 43-cü dəqiqədə öz istəyinə çatıb. Rəqib müdafiəçilərinin səhvindən məharətlə istifadə edən braziliyalı legioner dəqiq zərbə ilə qapıçını topu qapıdan çıxarmağa məcbur edib - 2:0.

“Qarabağ” fasiləyə iki top üstünlüklə yollanıb.

Fasilədən sonrakı ilk dəqiqələrdə komandalar hücumlarını daha da artırıblar. Lakin oyunda üstünlüyünü qorumağı bacaran “Qarabağ” rəqibin cərimə meydançasında ardıcıl təhlükəli vəziyyətlər yaradıb. Ağdam təmsilçisi azarkeşlərə üçüncü qol sevincini oyunun 61-ci dəqiqəsində yaşadıb. Künc zərbəsi ilə başlanan hücumda Riçard Almeydanın ideal ötürməsindən sonra Əfran İsmayılov “Qarabağ”ın üçüncü qolunu “Yanq Boyz” komandasının qapısından keçirib - 3:0.

Oyunun 71-ci dəqiqəsində meydanda Əfran İsmayılovu əvəz edən Raydel Pupon rəqib qapıçı ilə təkbətək qalsa da topu, düz onun üstünə vurub. Oyunun 85-ci dəqiqəsində isə künc zərbəsindən sonra qapıçının dəf etdiyi topa Coşqun Diniyevin yaxın məsafədən zərbəsi dəqiq olmayıb. Qalan vaxt ərzində və əsas hissəyə əlavə edilən 3 dəqiqədə hesab dəyişməyib və “Qarabağ” 3:0 hesabı ilə qalib gəlib.

Beləliklə, İsveçrənin “Yanq Boyz” kollektivini iki oyunun nəticəsinə görə 4:0 hesabı ilə məğlub edən “Qarabağ” komandası tarixində ikinci dəfə UEFA Avropa Liqasının qrup mərhələsində oynamaq hüququ qazanıb.