F.Köçərli adına Respublika Uşaq Kitabxanası ölkəmizi beynəlxalq konfransda təmsil edib
Bakı, 28 sentyabr, AZƏRTAC
Rusiya Dövlət Uşaq Kitabxanasında keçirilən "Ədəbiyyat ili: Uşaq mütaliəsi kitabxana məkanında" adlı beynəlxalq konfransda ölkəmizi F.Köçərli adına Respublika Uşaq Kitabxanasının direktoru Şəhla Qəmbərova və elmi işlər üzrə direktor müavini Zahirə Dadaşova təmsil ediblər.
Kitabxanadan AZƏRTAC-a bildirilib ki, konfransın açılışında Rusiya Federasiyası Mədəniyyət Nazirliyinin elm, təhsil, kitabxana və arxiv şöbəsinin müdiri Yevgeniya Quseva, vilayət uşaq kitabxanalarının direktorları, Moskva Kitab Ticarəti Şəbəkəsinin direktoru, Rusiya uşaq yazıçıları, bir çox uşaq dövri mətbuatının əməkdaşları, nəşriyyat işçiləri, o cümlədən MDB-dən Azərbaycan, Belarus, Ukrayna, Ermənistan, Qazaxıstan, Moldova, Latviya milli uşaq kitabxanalarının əməkdaşları və virtual şəbəkə vasitəsilə Rusiyanın 300-dən çox əyalətində yerləşən uşaq kitabxanaları iştirak edib.
Tədbir çərçivəsində Rusiya Dövlət Uşaq Kitabxanası ilə daim sıx əməkdaşlıq edən uşaqların sevimli jurnalı olan "Klyopa"nın 25 illiyi geniş qeyd olunub.
Konfransda Uşaqlara Kitabxana Xidməti Beynəlxalq Assosiasiyasının üzvü Cunko Yokatanın (ABŞ, Çikaqo) "Uşaq ədəbiyyatı müasir dünyada: uşaqlar nə oxuyur", İllinoys Universitetinin (ABŞ) professoru Uilyam Tilin "Kiçik yaşlı uşaqlarda ədəbiyyata marağın formalaşması" mövzusunda məruzələri böyük maraqla qarşılanıb. Bildirilib ki, uşaqların mütaliəsində ailə, məktəb başlıca rol oynasa da, onların düzgün formalaşmasında məhz uşaq kitabxanalarının rolu böyükdür.
Konfransda hər vilayət uşaq kitabxanasının il ərzində həyata keçirdiyi layihələr və beynəlxalq əməkdaşlığı haqqında məlumat verilib. Leninqrad Vilayət Uşaq Kitabxanasının təmsilçisi "Dostluğun kitab rəfi " layihəsinin ilk olaraq Azərbaycan ilə birgə həyata keçirməsindən geniş söhbət açıb, bu istiqamətdə ölkəmizin Mədəniyyət və Turizm Nazirliyinin fəaliyyətini yüksək qiymətləndirib.
Konfransın ikinci günü F.Köçərli adına Respublika Uşaq Kitabxanasının direktoru Şəhla Qəmbərova "Uşaqların mütaliəyə cəlbi: Mütaliə haqqında düşüncələr" adlı çıxışında son illərdə kitabxananın bir çox dövlətlərlə əməkdaşlığından, habelə mütaliəyə cəlb etməyin yeni forma və metodlarından danışıb. Slaydlarla nümayiş olunan çıxış auditoriyanın diqqətini xüsusilə cəlb edib. Virtual əlaqədə olan kitabxanaçıların sualları məruzəçi tərəfindən cavablandırılıb. Bir çox vilayət uşaq kitabxanalarının (Nijni Novqorod, Saratov, Çelyabinsk, Perm, Xakasiya, Rostov) direktorları F.Köçərli adına Respublika Uşaq Kitabxanası ilə əməkdaşlığa dair təklif irəli sürüblər.
Əməkdaşlığın əsas məqsədi Azərbaycan Uşaq Ədəbiyyatı Fondunu yaratmaqla, həmin diyarda yaşayan azərbaycanlı uşaqlara kömək etmək, bu sahədə oxucu mütaliəsinə düzgün rəhbərlik etməklə kitab və kitabxana imicinin artmasına nail olmaqdır.
Konfransın son günündə MDB ölkələri milli uşaq kitabxanalarından gələn əməkdaşlar üçün "dəyirmi masa" təşkil olunub. Burada beynəlxalq layihələrin həyata keçirilməsi ilə uşaq psixologiyasının düzgün formalaşdırılması, tolerantlıq hisslərinin artması, sülh şəraitində uşaqların böyüməsində kitabın təbliğindən istifadə etmək məsələləri müzakirə edilib.
Rusiya Dövlət Uşaq Kitabxanasının ənənəvi olaraq hər il keçirdiyi bu konfrans bu dəfə geniş əhatəliliyi ilə yüksək səviyyəli beynəlxalq tədbir kimi yadda qalıb.
Bölmənin digər xəbərləri
