8 MAY
1992-ci il. Erməni silahlı bölmələri Şuşanı işğal edib. İşğalı zamanı yerli əhalinin 193 nəfəri şəhid, 102 nəfəri isə əlil olub, bir sıra tarixi-mədəniyyət abidələri, muzeylər, məscidlər düşmən tərəfindən talan edilib və yandırılıb. Azərbaycanın bu dilbər guşəsi 24 ildir ki, işğal altındadır.
1992-ci il. Azərbaycan Respublikası İtaliya və İsveç ilə diplomatik əlaqələr qurub.
1883-cü il. Bakı-Tiflis dəmir yolu xətti açılıb. Həsən bəy Zərdabi Bakı-Tiflis dəmir yolunun çəkilməsini Azərbaycanın iqtisadi həyatının yüksəlməsində Bakı neftindən sonra ikinci böyük amil kimi qiymətləndirirdi.
1919-cu il. Bəstəkar, pedaqoq Soltan Hacıbəyovun doğum günü. O, Üzeyir Hacıbəylinin qardaşı oğludur. Azərbaycan Dövlət Konservatoriyasında müəllim, M.Maqomayev adına Azərbaycan Dövlət Filarmoniyasında bədii rəhbər, Dövlət Konservatoriyasının rektoru, Azərbaycan Bəstəkarlar İttifaqının katibi olub. 1945-ci ildə Türkmənistan Opera və Balet Teatrı S.Hacıbəyova "Kəminə və Qazı" operasını yazmağı sifariş edir. Həmin əsərin simfonik parçası olan "Karvan" "Şur" muğamı üzərində bəstələnib. 1950-ci illərin ən məşhur əsərlərindən biri də onun simfonik orkestr üçün yazılmış “Uvertüra”sıdır.
