9 MAY
9 May faşizm üzərində Qələbə günüdür. Bəşəriyyət üçün dəhşətli, faciəli fəlakətlər dövrü kimi yadda qalan İkinci Dünya müharibəsi həmin gün SSRİ-nin qələbəsi ilə başa çatıb və faşizm süqut edib.
Azərbaycan faşizm üzərində tarixi Qələbəyə sanballı töhfələr verib. Bu şanlı Qələbədə böyük payı olan Azərbaycan xalqı cəbhəyə 600 mindən çox oğul və qızını yola salıb. Onların təxminən yarısı döyüş meydanlarından geri qayıtmayıb. Həmin müharibə zamanı göstərdikləri igidliyə görə 130-dan çox Azərbaycan vətəndaşı Sovet İttifaqı Qəhrəmanı adına layiq görülüb, 170 mindən çox əsgər və zabitimiz isə müxtəlif orden və medallarla təltif edilib.
İkinci Dünya müharibəsində Qələbənin qazanılmasında Bakı nefti əvəzsiz rol oynayıb. 1941-1945-ci illər müharibəsi zamanı Sovet İttifaqının sərf etdiyi neftin 70 faizindən çoxu, benzinin 80 faizi, motor yağlarının isə 90 faizi Azərbaycanın payına düşüb. Azərbaycan Berlinin alınması zamanı Almaniya səmasında cövlan edən 7 min hərbi təyyarənin yanacaq təchizatında da mühüm rol oynayıb.
2009-cü il. Bakıda Talassemiya Mərkəzi açılıb. Bu Mərkəz Heydər Əliyev Fondunun “Talassemiyasız həyat naminə” proqramı çərçivəsində yaradılıb. Talassemiya Mərkəzi bu xəstəliyə düçar olanlara həm tibbi, həm də mənəvi cəhətdən dəstək baxımından önəmli səhiyyə ocağıdır.
1754-cü il. Amerika Birləşmiş Ştatlarının banilərindən biri olan Benjamin Franklin özünün “Pennsylvania Gazette” qəzetində ilk Amerika karikaturasını nəşr etdirib.
Səkkiz hissəyə bölünmüş ilanın əks olunduğu karikaturada səkkiz müstəmləkənin baş hərfləri yazılıb. Karikaturanın altında “Birləşək, ya da ölək” sözləri yer alıb. Bu karikatura müstəmləkələrin İngiltərədən ayrılmasında bir təkan oldu.
1936-cı il. Benito Mussolini Efiopiyanın İtaliyaya birləşdiyini elan edib. 1935-ci ilin oktyabr ayında İtaliya ordusu Efiopiyaya hücum edib. 1936-cı il mayın 5-də Efiopiya imperatoru ölkəni tərk edib. Mayın 9-da İtaliya Efiopiyanın üçdə bir hissəsini ələ keçirib və bununla da Mussolini bu ölkənin öz hakimiyyəti altında birləşdiyini elan edib.
1967-ci il. Əfsanəvi boksçu Məhəmməd Əli orduda xidmət etməkdən imtina etdiyinə görə ona qarşı ittiham irəli sürülüb və o, Dünya Boks Assosiasiyasının qərarı ilə dünya çempionu tutulundan məhrum edilib.
