ELM VƏ TƏHSİL


Azərbaycan İlahiyyat İnstitutunun açılışı olub

Bakı, 17 sentyabr, AZƏRTAC

Sentyabrın 17-də Azərbaycan İlahiyyat İnstitutunun (Aİİ) açılış mərasimi keçirilib.

AZƏRTAC xəbər verir ki, tədbirdə Azərbaycan Respublikası Prezidenti Administrasiyasının Millətlərarası münasibətlər, multikulturalizm və dini məsələlər şöbəsinin müdiri Etibar Nəcəfov, Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı, Milli Məclisin ictimai birliklər və dini qurumlar komitəsinin sədri Siyavuş Novruzov, Türkiyə Diyanət Vəqfi 29 Mayıs Universiteti İdarə Heyətinin sədri Tayyar Altıkulac, Azərbaycanda fəaliyyət göstərən dini icmaların rəhbərləri və digər məsul şəxslər iştirak ediblər.

Tədbirdə Aİİ-nin rektoru, ilahiyyat üzrə fəlsəfə doktoru Ceyhun Məmmədov əsasını ulu öndər Heydər Əliyevin qoyduğu dövlət-din siyasətinin Prezident İlham Əliyev tərəfindən uğurla davam etdirildiyini, Azərbaycan Respublikasının Birinci vitse-prezidenti Mehriban Əliyevanın rəhbərlik etdiyi Heydər Əliyev Fondunun da bu sahəyə xüsusi diqqət və qayğı göstərdiyini vurğulayıb. Aİİ-nin yaradılmasının dövlətimizin başçısının dinə, mənəvi dəyərlərə qayğısının ən böyük göstəricilərindən biri olduğunu söyləyən rektor bu müdrik qərara və din sahəsinə göstərdiyi yüksək diqqətə görə bütün ilahiyyatçılar adından Prezident İlham Əliyevə minnətdarlığını bildirib. C.Məmmədov deyib: “Sovet dövrünün qadağa və məhdudiyyətləri ilə üzləşən, ancaq ruhdan düşməyən, gələcəyə ümidlə baxan ruhanilərimizin ən böyük arzularından biri Azərbaycanda ali dini təhsil müəssisəsinin yaradılması olub. Belə ki, Aİİ-nin yaradılması Azərbaycanın dövlətçilik tarixində dini sahədə qəbul edilmiş ən ciddi qərarlardan biridir. Biz bu məsuliyyətin yükünü anlayır, dövlətimizin göstərdiyi etimadı, xalqımızın bizə bəslədiyi inam və ümidi doğrultmaq üçün səylə çalışırıq. 2018-2019-cu tədris ilində dövlət sifarişi əsasında qəbul üzrə Aİİ-nin islamşünaslıq ixtisasına 35, dinşünaslığa isə 25 plan yeri təsdiq edilib. Bu ayrılmış plan yerləri 100 faiz dolub. İnstitutun dinşünaslıq və islamşünaslıq ixtisasları üzrə təhsil standartları Təhsil Nazirliyinə təqdim edilib və nazirliyin müvafiq şöbəsindən müsbət rəy alınıb. Hazırda institutda bir fakültə, üç kafedra mövcuddur. İnstitutda tədris Azərbaycan dilində həyata keçirilir. Gələcəkdə rus, ingilis və ərəb dilli bölmələrin açılması və dünyanın müxtəlif ölkələrindən tələbələrin institutda təhsilə cəlb olunması nəzərdə tutulur”.

Rektor diqqətə çatdırıb ki, DQİDK tərəfindən Aİİ-nin bir tələbəsi üçün Heydər Əliyev adına təqaüd təsis edilib. Qafqaz Müsəlmanları İdarəsi (QMİ) də tələbələrdən biri üçün aylıq təqaüd ayırıb.

Aİİ-nin fəaliyyətə başlamasını ölkəmizin müasir tarixində mühüm hadisə kimi dəyərləndirən Etibar Nəcəfov bildirib ki, institutun yaradılması böyük siyasi və mədəni əhəmiyyətə malikdir. Aİİ əsası Ulu Öndər tərəfindən qoyulan və Prezident İlham Əliyevin uğurla davam etdirdiyi dövlət-din münasibətlərinin xüsusi modelinin təkmilləşdirilməsi istiqamətində fəaliyyət göstərəcək. Ölkəmizdə dinlərarası münasibətləri daha da dərinləşdirəcək Aİİ azərbaycançılıq ideyasına sadiq qalaraq dövlət-din münasibətlərinin inkişafına nail olacaq. İnstitutun yaradılmasının digər mühüm əhəmiyyəti ondan ibarətdir ki, bu ali təhsil ocağı xalqımızın zəngin milli mənəvi dəyərlərinin qorunub saxlanmasında və inkişafında da böyük əhəmiyyətə malikdir. İnstitut, həmçinin ölkəmizə daxil olan zərərli ideyaların qarşısının alınmasında səylə çalışacaq, terrorizmə, ekstremizmə qarşı mübarizədə mühüm rol oynayacaq.

Gələcəkdə Aİİ-nin nüfuzlu xarici universitetlər ilə beynəlxalq layihələr çərçivəsində əməkdaşlığının nəzərdə tutulduğunu deyən E.Nəcəfov diqqətə çatdırıb ki, bu da Azərbaycanda dünya ölkələrinə nümunə göstəriləcək dövlət-din münasibətlərinin təbliğinə xidmət edəcək.

Tədbirdə çıxış edən Mübariz Qurbanlı dövlət-din münasibətləri sahəsindəki siyasətin əsas istiqamətləri, multikultural dəyərlərin qorunması, tolerantlıq mühitinə, milli mənəvi dəyərlərə bağlılığın gücləndirilməsindən danışıb. Vurğulanıb ki, din dövlətdən ayrı olsa da, dövlət-din münasibətləri Azərbaycan Respublikasının tərəfdar çıxdığı beynəlxalq konvensiyalarla və ölkəmizin mövcud qanunvericiliyi ilə tənzimlənir. Bununla yanaşı, Azərbaycan dövləti İslam dininə, eləcə də ölkəmizdə tarixən mövcud olan bir çox dinlərə, həmin dinlərlə bağlı müqəddəs məkanlara tarixi, maddi-mədəni irsin bir hissəsi kimi yanaşır və bu məkanların təmirinə, mənəvi dəyərlərin geniş təbliğinə daim dəstək verir.

M.Qurbanlı diqqətə çatdırıb ki, Aİİ Azərbaycanda İslam dini ilə yanaşı, digər dinlər üzrə də kadr hazırlığına böyük ehtiyac duyulduğu üçün təsis edilib. O deyib: “Aİİ ölkəmizdə yeganə ali təhsil ocağıdır ki, burada ödənişsiz təhsil sistemi tətbiq olunur. Din sahəsində kadr hazırlığının geniş səpkidə həyata keçiriləcəyi bu ali təhsil ocağında oxuyan tələbələrin hamısına təqaüd verilməsi və digər güzəştlərin tətbiq olunması da nəzərdə tutulub. Hesab edirəm ki, Aİİ-nin yetişdirəcəyi kadrlar milli mənəvi dəyərlərimizin qorunmasında öz layiqli töhfələrini verəcəklər”.

Prezident İlham Əliyevin “Azərbaycan İlahiyyat İnstitutunun yaradılması haqqında” 2018-ci il 9 fevral tarixli Sərəncamını xatırladan Siyavuş Novruzov Aİİ-nin fəaliyyətə başlamasının zərurətdən irəli gəldiyini bildirib. “Əminəm ki, bu ali təhsil ocağı dinin Azərbaycanda düzgün formada təbliğinə xidmət göstərəcək. Belə bir institutun ölkəmizdə fəaliyyət göstərməsi müvafiq sahədə kadrların yetişməsinə zəmin yaradacaq. Ümidvaram ki, hazırda ilk addımlarını atan Aİİ gələcəkdə daha geniş istiqamətlərdə fəaliyyət göstərməsi üçün səylə çalışacaq”, - deyə o bildirib.

Sonra T.Altıkulac, QMİ-nin sədr müavini Hacı Fuad Nurullah, Təhsil Nazirliyinin aparat rəhbərinin müavini Fərzəli Qədirov, Bakı Dövlət Universiteti (BDU) rektorunun müşaviri, professor İsmayıl Əliyev, BDU-nun ərəb filologiyası kafedrasının müdiri, akademik Vasim Məmmədəliyev, Bakı və Azərbaycan Yeparxiyasının arxiyepiskopu Aleksandr İşein, Bakı Dağ Yəhudiləri Dini İcmasının sədri Milix Yevdayev, Avropa yəhudilərinin Bakı dini icmasının sədri Aleksandr Şarovski və Alban-Udi xristian dini icmasının sədri Robert Mobili çıxış edərək Aİİ-nin yaranması münasibətilə xalqımızı və institut heyətini təbrik ediblər. Natiqlər yeni təhsil müəssisəsinin quruculuğu sahəsində görülən işləri təqdir edərək Aİİ rəhbərliyinin və formalaşdırılan kollektivin bu böyük məsuliyyətin öhdəsindən uğurla gələcəyinə əminliyini bildiriblər.

Sonda tədbirdə iştirak edən dini icmaların rəhbərlərinin adından Prezident İlham Əliyevə müraciət ünvanlanıb.

Müraciətdə dini icmaların rəhbərləri dünyanın bir çox ölkəsində ksenofobiya, islamofobiya, antisemitizm, irqi ayrı-seçkiliyin tüğyan etdiyi bir dövrdə Azərbaycanda müxtəlif millətlərin və dinlərin nümayəndələrinin qardaşlıq və həmrəylik şəraitində yaşadığını, ölkədəki bu tolerant mühitin ümummilli lider Heydər Əliyevin mütərəqqi dövlət-din siyasəti nəticəsində yaradıldığını və bu siyasətin Prezident İlham Əliyev tərəfindən uğurla davam etdirildiyini vurğulayıblar. Aİİ-nin istər İslam dini, istərsə də digər dünya dinlərini dərindən bilən, dövlətçiliyin keşiyində duran yüksək ixtisaslı dinşünas və islamşünas kadrlar hazırlayaraq, təkcə Azərbaycanda deyil, bütün dünyada tanınan ali təhsil müəssisələrindən birinə çevriləcəyinə inamlarını ifadə edən müraciət müəllifləri ölkəmizdə milli mənəvi dəyərlərin qorunmasına, multikulturalizm və tolerantlıq ənənələrinin möhkəmləndirilməsinə göstərilən qayğının əyani göstəricisi olan bu ali təhsil ocağının yaranması haqqında imzaladığı Sərəncama görə Prezident İlham Əliyevə dərin təşəkkür və minnətdarlıqlarını bildiriblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.