Azərbaycan nümayəndə heyəti Beynəlxalq Miqrasiya Təşkilatı Şurasının 109-cu sessiyasında iştirak edir
Bakı, 26 noyabr, AZƏRTAC
Dövlət Miqrasiya Xidmətinin rəisi Vüsal Hüseynovun rəhbərlik etdiyi nümayəndə heyəti Beynəlxalq Miqrasiya Təşkilatı (BMqT) Şurasının 109-cu sessiyasına qatılmaq üçün İsveçrədə səfərdədir.
DMX-dən AZƏRTAC-a bildiriblər ki, noyabrın 27-dən 30-dək Cenevrədəki Beynəlxalq Konfrans Mərkəzində keçiriləcək sessiyada təşkilati məsələlərə baxılacaq, Şura sədri, sədr müavinləri və məruzəçilər seçiləcək.
Sessiyada BMqT-nin yeni baş direktoru Antonio Vitorinonun hesabat məruzəsi ilə çıxışı planlaşdırılır.
Tədbir çərçivəsində qlobal miqrasiya proseslərinin müxtəlif aspektlərini əhatə edən “Birləşmiş Millətlər Təşkilatının Miqrasiya üzrə Şəbəkəsi: İcmal”, “Miqrasiya ilə əlaqədar səhiyyə üzrə siyasətin uzlaşdırılması: çağırışlar və imkanlar” və “Daxili köçürülmələrə cavab: Dövlətlərlə dialoq” mövzularında yüksək səviyyəli panel iclaslarının keçirilməsi nəzərdə tutulur.
Sessiya işini noyabrın 30-da yekunlaşdıracaq.
Bölmənin digər xəbərləri
