Bakı, 24 yanvar (AZƏRTAC). Yanvarın 24-də Azərbaycan Rəssamlar İttifaqının Vəcihə Səmədova adına sərgi salonunda tanınmış rəssam Mircəlil Seyidovun fərdi sərgisi açılmışdır.

AZƏRTAC xəbər verir ki, sərginin açılış mərasimində Azərbaycan rəssamlıq məktəbinin ənənələrini öz əsərlərində ustalıqla yaşadan Mircəlil Seyidovun həyat və yaradıcılığından söhbət açılmışdır.

Bildirilmişdir ki, 1948-ci ildə Naxçıvan şəhərində anadan olmuş Mircəlil Seyidov Əzim Əzimzadə adına Rəssamlıq Məktəbini, daha sonra Sankt-Peterburqda Muxina adına Ali Bədii-Sənaye Məktəbini bitirmişdir. O, 1972-ci ildən bir sıra respublika, ümumittifaq və beynəlxalq sərgilərdə iştirak etmişdir. 1999-2004-cü illərdə Türkiyədəki Antalya Ağdəniz Universitetinin müəllimi kimi fəaliyyət göstərmişdir. 2002-ci ildə Azərbaycan Respublikasının Əməkdar Rəssamı fəxri adına layiq görülmüşdür. 2009-cu il iyun ayının 18-də Naxçıvan şəhərində vəfat etmişdir.

Diqqətə çatdırılmışdır ki, mərhum sənətkarın bütün tabloları bədii kamilliyi və orijinallığı ilə seçilir. Rəssamın 20 Yanvara həsr olunmuş tablolarında Azərbaycan xalqının faciəsi rənglərin dili ilə tamaşaçıya çatdırılır. O, “Qaçqınlar”, “Əzab çəkmiş qoca” və “Həsrət” əsərlərində isə bir milyondan artıq qaçqının yaşadığı sarsıntıları kətan üzərinə köçürmüşdür.

Mircəlil Seyidovun şah əsəri “Sənət və sənətçilər”dir. Sənətkarın dərin fantaziyasının, gərgin axtarışlarının bəhrəsi olan bu əsərdə bir bütövlük əks olunmuşdur.

Tədbirdə çıxış edən Azərbaycan Rəssamlar İttifaqının sədri Fərhad Xəlilov bu torpağın əzəmətini, gözəlliyini duyub əsərlərində canlandıran Mircəlil Seyidovun Azərbaycan rəsm sənətinin inkişafına verdiyi töhfələrdən danışmış, onun təkrarsız əsərlərinin həmişə tamaşaçı rəğbəti qazanacağına əminliyini bildirmişdir.

Qeyd edilmişdir ki, Mircəlil Seyidov həyatının mənasını rənglərdə tapan və torpağını qəlbən sevən bir rəssam idi. Tanınmış rəssam doğma Vətənimizin əsrarəngiz gözəlliklərini öz əsərləri ilə çox yerdə tanıtmışdır. O, istər Bakıda, istərsə də xarici ölkələrdə keçirilən sərgilərdə Azərbaycanı ləyaqətlə təmsil etmişdir. Buna görə də Mircəlil Seyidovun əsərləri əbədiyaşarlıq hüququ qazanmışdır. Onun Azərbaycan rəsm sənətinə bəxş etdiyi özünəməxsus yaradıcılıq nümunələri gənc istedadlı rəssamların yetişməsinə təkan verəcəkdir.

Mərasimdə çıxış edən Mədəniyyət və Turizm Nazirliyinin sektor müdiri Qalib Qasımov demişdir ki, hər gün yanından dəfələrlə ötüb keçdiyimiz, bəzən bizə çox adi görünən məqamları rənglərin dili ilə kətana köçürmüş Mircəlil Seyidovun əsərləri hər kəsi düşünməyə vadar edir.

Bildirilmişdir ki, əsərlərindəki aydın fikir, rəng çalarlarının cazibəsi, forma gözəlliyi və məzmun dərinliyi Mircəlil Seyidova böyük uğurlar gətirmişdir. Bu səbəbdən də onun əsərləri Azərbaycan Respublikası Mədəniyyət və Turizm Nazirliyinin bədii fondunda, Almaniya, Avstriya, ABŞ, Türkiyə, Fransa, İngiltərə və digər ölkələrin muzeylərində, rəsm qalereyalarında və şəxsi kolleksiyalarda özünə yer almışdır. Ömrünü yaradıcılıq axtarışlarına həsr edən sənətkarın respublikamızın hüdudlarından kənarda tanınması hər bir azərbaycanlının qəlbini qürur hissi ilə doldurur.

Naxçıvan Muxtar Respublikasının Əməkdar Rəssamı Məhəmmədəli Ələkbərov isə bildirmişdir ki, Mircəlil Seyidov öz yaradıcılığının böyük bir hissəsini böyük mütəfəkkir, şair və dramaturq Hüseyn Cavidə həsr etmişdir. Müxtəlif janr və üsullardan istifadə edən sənətkar bir-birinin ardınca “Cavidi düşünürkən”, “Cavid gəlir”, “Cavidlə İblisin dialoqu”, “Şairin yuxusu” və “Cavid dünyası” adlı əsərlər yaratmışdır.

Vurğulanmışdır ki, istedadlı rəssam dərindən duyduğu Cavid fəlsəfəsini kətan üzərində çox ustalıqla təqdim etmişdir. Rəssamın ustalığı ondadır ki, rənglər harmoniyasını kətana həkk edə bilir. Onun qəlbinin səsi, içinin musiqisi rənglərə çevrilir.

Türkiyədəki Antalya Ağdəniz Universitetinin müəllimi, sənətşünaslıq üzrə fəlsəfə doktoru Tərlan Mehdiyeva bildirmişdir ki, Mircəlil Seyidovun özünəməxsus dəst-xətti, sənət aləmindəki təkrarsızlığı yaradıcılığının ilk illərindən özünü büruzə vermişdir. O, orijinal əsərləri ilə daim sənətsevərlərin qəlbinə yol tapmışdır.

Tərlan Mehdiyeva demişdir: ”Son illərin məhsulu olan əsərlərində rəssam öz dünyasına baş vuraraq orada sənət uğurları axtarırdı. Bir zamanlar oxuduğu bir məqalədə “Sahilsiz dəniz istəyirəm” sözü onun qəlbində yuva salmışdı. Mircəlil Seyidovun əsərlərində dənizin ilahi nəğməsi müxtəlif rəng çalarları ilə yoğurulmuşdu. Onun “Qayıqlar” silsilə rəsmləri bu səpkidən olan əsərlərdir. Rənglərə qarşı son dərəcə emosional olan rəssam onlar arasındakı mütənasibliyə daha çox diqqət yetirirdi”.

Mircəlil Seyidovun həyat yoldaşı Südabə Sadıqova mərasimdə çıxış edərək sərginin təşkilində əməyi olan hər kəsə minnətdarlığını bildirmişdir.

Sonra sərgi ilə tanışlıq olmuşdur.

Üç gün davam edəcək sərgidə rəssamın 75 əsəri nümayiş etdirilir.