ELM VƏ TƏHSİL
Ümummilli Liderin Azərbaycan rəhbərliyinə qayıdışı ilə ölkə həyatının bütün sahələrində dönüş yarandı
Bakı, 14 iyun, AZƏRTAC
Ötən əsrin 90-cı illərinin əvvəllərində müstəqilliyini yenicə bərpa etmiş Azərbaycan Respublikası keçid dövrünün ağrılı problemlərini Dağlıq Qarabağda erməni separatçılarının və Ermənistan respublikasının hərbi təcavüzünü dəf etməklə bir arada həll etmək məcburiyyətində qalmışdı. Həmin dövrdə ölkə rəhbərliyində təmsil olunan şəxslərin zəif iradəli olmaları, kadrların bacarıqsızlığı və səriştəsizliyi xalqımızı yeganə ümid yeri kimi Heydər Əliyevə üz tutmağa məcbur etdi. Ulu Öndərin uzun müddət Azərbaycana rəhbərlik etməsi, respublikamızı qısa müddət ərzində bütün əsas göstəricilər üzrə qabaqcıllar sırasına çıxarması, Sovet İttifaqı rəhbərliyində uğurlu addımları qədirbilən xalqımızın xatirəsində idi. Ona görə də ozamankı rəhbərliyin hər növbəti səhvi, ordumuzun cəbhədəki uğursuzluğu Heydər Əliyevi xilaskar kimi görənlərin sayını artırırdı.
Bu fikirləri AZƏRTAC-a müsahibəsində Azərbaycan Universitetinin professoru, tarix üzrə elmlər doktoru, ictimai elmlər kafedrasının müdiri Qabil Əliyev söyləyib. O qeyd edib ki, 1993-cü il iyunun 4-də Gəncə şəhərində Surət Hüseynovun başçılığı ilə hərbi qiyam baş verməsi respublikamızı vətəndaş müharibəsi, qardaş qırğını təhlükəsi ilə üz-üzə qoydu. Hadisələrə dərhal kəskin müdaxilə edilməməsi Azərbaycanın dövlət müstəqilliyini də təhlükə altına saldı. Xalqın təkidli tələbi ilə hakimiyyətə qayıdan Heydər Əliyev iyunun 15-də Azərbaycan Ali Sovetinin sədri seçildi, iyunun 24-dən Azərbaycan Respublikası Prezidentinin səlahiyyətlərini həyata keçirməyə başladı. 1993-cü il oktyabrın 3-də isə ümumxalq səsverməsi nəticəsində Azərbaycan Respublikasının Prezidenti seçildi.
Ümummilli Liderin Azərbaycan rəhbərliyinə qayıdışı ilə ölkənin ictimai-siyasi, sosial-iqtisadi, elmi-mədəni həyatında, ordu quruculuğunda, beynəlxalq əlaqələrində dönüş yarandı, elmi əsaslara, beynəlxalq norma və prinsiplərə uyğun müstəqil dövlət quruculuğu prosesinə başlandı. Azərbaycan dövlətçiliyinə qarşı yönəlmiş xain addımların qarşısı bir-birinin ardınca alındı. Xüsusən 1994-cü ilin oktyabrında və 1995-ci ilin martında dövlət çevrilişi cəhdlərinin qarşısı qətiyyətlə, sərt şəkildə alındı, dövlət müstəqilliyi qorunub saxlandı, silahlı yolla hakimiyyətə gəlmək cəhdlərinə birdəfəlik son qoyuldu.
Tariximizin həmin ağır, taleyüklü məqamlarında Vətənimizi ağır sınaqlardan çıxarmaq vəzifəsi zəmanəsinin böyük və uzaqgörən siyasətçisi Heydər Əliyevin üzərinə düşmüşdü. Ümummilli Lider çox mürəkkəb, ağır, hətta çıxılmaz hesab olunan vəziyyətlərdən ən doğru çıxış yolu tapmaq bacarığı ilə bütün müşkül problemləri bir-birinin ardınca çözdü, müstəqil dövlətçiliyin möhkəm təməllərini yaratdı.
Məhz onun müdrikliyi, qətiyyəti, iradəsi sayəsində dövlət müstəqilliyimiz sarsılmaz və dönməz oldu, ölkəmiz sürətli inkişaf yoluna qədəm qoydu. Ulu öndərin uzaqgörən siyasəti nəticəsində ölkəmizin təbii sərvətlərindən səmərəli istifadə edilməsi, “Əsrin müqaviləsi”nin imzalanması, böyük layihələrin reallaşdırılması mümkün oldu. Azərbaycan iqtisadiyyatının bütün sahələrinin inkişafına şərait yaradıldı, yeni istehsal müəssisələri işə salındı, yüz minlərlə iş yeri açıldı. Bütün bunlar da öz növbəsində xalqımızın maddi rifahının yaxşılaşmasına səbəb oldu.
Bu gün fəxrlə bildiririk ki, ulu öndər Heydər Əliyev müstəqil Azərbaycanın qurucusudur. Ümummilli Lider “Biz müstəqil Azərbaycan kimi əzəmətli bir abidənin təməlini qoyuruq, onu qururuq, yaradırıq. Onu indiki nəsillər üçün yaradırıq, gələcək nəsillər üçün yaradırıq. Bizim üzərimizə şərəfli vəzifə düşübdür və bunu layiqincə yerinə yetirməliyik”, - deyərək bu nəcib missiyanı öz üzərinə götürdü, müstəqil, qüdrətli Azərbaycan dövlətini yaratdı. Bu gün Azərbaycanda qazanılan böyük uğurların bir səbəbi var – o da ölkəmizdə Heydər Əliyev siyasi kursunun ardıcıl şəkildə davam etdirilməsidir. Heydər Əliyev siyasətini layiqincə davam etdirən Prezident İlham Əliyevin həyata keçirdiyi çoxşaxəli siyasət dövlət müstəqilliyinin qorunmasına və daha da möhkəmləndirilməsinə xidmət edir.