Cari il mayın 13-də Azərbaycan Respublikasının Prezidenti İlham Əliyev 30-cu yubiley Azərbaycan Beynəlxalq Qida Sənayesi sərgisi (“InterFood Azerbaijan”) və 18-ci Azərbaycan Beynəlxalq Kənd Təsərrüfatı sərgisi (“Caspian Agro”) çərçivəsində "Caspian Energy Club"ın stendini ziyarət edib.

“Caspian Energy Club”ın sədri və qrupun baş icraçı direktoru Telman Əliyev prezidentə “Caspian Energy Holding”in yaradılması haqqında məlumat verib.

Uzun illərdir “Caspian Energy” brendi altında fəaliyyət göstərən networking platformalar, media layihələr, forumlar və mükafatlar artıq vahid idarəetmə strukturu altında birləşdirilir və bu məqsədlə “Caspian Energy Holding” təsis edilir. Yeni holdinqin əsas hədəfi “Caspian Energy” brendi çərçivəsində mövcud olan bütün layihələrin vahid çətir altında toplanması və strukturlaşdırılması, daha effektiv idarə olunması, rəqəmsallaşdırılması və beynəlxalq miqyasda inkişaf etdirilməsidir.

“Caspian Energy Holding”ə məxsus şirkətlər və layihələr fəaliyyət növünə uyğun olaraq qruplara bölünüb:

• “Caspian Energy Club”

• “Caspian Energy Club International”

• “Caspian Energy Event Group”

• “Caspian Energy International Media Group”

• “Award Organizers Group”

• “Caspian Energy Research Group”

• “Caspian Energy Entertainment Group”

• “Caspian Energy Jobs”

Yeni struktura daxil olan layihələrin rəqəmsallaşdırılması və vahid ekosistem formatında qlobal miqyasda əlçatan olması əsas prioritetlərdən biridir. Bu məqsədlə “Caspian Energy Holding”in 50 faiz payı satışa çıxarılır. İnvestisiya fürsətləri çərçivəsində 50 faiz payın satışı potensial tərəfdaşlara “Caspian Energy Holding” və onun tərkibindəki bütün layihələrin birbaşa ortağı olmaq imkanı yaradır. Bu, eyni zamanda, iştirakçılara öz məhsul və xidmətlərini qlobal arenada tanıtmaq, beynəlxalq əməkdaşlıqlarda strateji rol oynamaq imkanı verir. Paralel olaraq “Caspian Energy Holding”ə daxil olan şirkət və layihələr fərqli qruplara bölünərək 25 faizdən 75 faizə qədər paylarla satışa təqdim olunacaq.

Satışdan əldə ediləcək vəsait hesabına vahid rəqəmsal ekosistem yaradılacaq. Bu ekosistem üzərində “Caspian Energy Club”, Avropa ilə İqtisadi Əməkdaşlıq İctimai Birliyi və Azərbaycan Milli Biznes Assosiasiyası 100-dən artıq ölkəsindən olan sahibkarlara networking qurmaq imkanı yaradacaq.

Xatırlatmaq istərdik ki, Azərbaycan Milli Biznes Assosiasiyası və ona məxsus olan brendlər və layihələr “Caspian Energy Holding” tərəfindən yeddi il müddətində idarə olunacaq və bu müddətdən sonra müstəqil şəkildə fəaliyyət göstərəcək. Vahid rəqəmsal ekosistem vasitəsilə qlobal biznes əlaqələrinin qurulması, partnyor əməkdaşlıqlarının inkişaf etdirilməsi, xidmət və məhsulların beynəlxalq bazarlarda tanıdılması mümkün olacaq. Ekosistem B2B, B2G və B2C formatlarında fəaliyyət göstərəcək, eyni zamanda, yerli və qlobal bizneslərin dövlət qurumları ilə birbaşa əlaqələrin qurulmasına dəstək verəcək. “Caspian Energy Club”a daxil olan sahibkarlar vahid ekosistem çərçivəsində hal-hazırda mövcud olan bütün xidmətlərlə yanaşı hüquq, maliyyə, turizm, konsaltinq və digər xidmətlərdən yararlana biləcəklər. Ekosistemə inteqrasiya olan qlobal loyallıq proqramı da tətbiq ediləcək.

“Caspian Energy Holding”, həmçinin investisiya agentliyi formatında fəaliyyət göstərəcək və dünyanın müxtəlif ölkələrindən olan investorları Azərbaycanda və Orta Dəhliz ölkələrində fəaliyyət göstərən istehsalçılarla və regionlarda yaradılan investisiya mühiti ilə tanış edəcək. Bundan əlavə, holdinq Orta Dəhliz ölkələrində istehsal olunan məhsul və xidmətləri beynəlxalq bazarlara çıxarılmasında aktiv rol oynayacaq.

“Caspian Energy Holding”in beş ildən sonra IPO-ya çıxarılması planlaşdırılır.

“Caspian Energy Holding”ə daxil olan şirkət və təşkilatlar haqqında qısa məlumat:

2002-ci ildə dünyanın iri transmilli, dövlət və özəl neft-qaz və enerji şirkətləri tərəfindən yaradılan, mənzil-qərargahı Bakıda yerləşən “Caspian Energy Club” dünyanın 50 ölkəsindən 5000-dən çox şirkəti birləşdirən və dinamik inkişaf edən beynəlxalq biznes-networking platformasıdır.

“Caspian Energy Club” biznes-hökumət dialoqunun fəal iştirakçısıdır və əsas məqsədlərindən biri, Azərbaycanda və “Caspian Energy Club”ın fəaliyyət göstərdiyi digər ölkələrdə investisiya və işgüzar mühitin yaxşılaşdırılmasıdır.

“Caspian Energy Club International” 2023-cü ildə “Caspian Energy Club”ın beynəlxalq layihələrini və dünyanın 63 şəhərində fəaliyyət göstərən xarici ofisləri vahid standartlar əsasında idarə etmək məqsədilə yaradılıb.

Bu strukturun nəzdində idarə olunan və yaxın 7 il ərzində dünyanın 100 ölkəsində nümayəndəlik açılması planlaşdırılan Azərbaycan Milli Biznes Assosiasiyası (MİLLİ.BİZ) ölkə daxilində və ölkə hüdudlarından kənarda Azərbaycan sahibkarlarını birləşdirən, regionlarda istehsal olunan məhsul və xidmətləri beynəlxalq bazarlara çıxaran, həmçinin regionlara beynəlxalq investisiyaların cəlb edilməsində aktiv rol oynayan vahid işgüzar platformadır.

2004-cü ildən fəaliyyət göstərən “Caspian Energy Event Group” dünyanın 20-dən çox ölkəsində “Caspian Energy Forum”, “Caspian Investment Forum”, Milli Biznesin İnkişafı Forumu, Milli Maliyyə Əlçatanlığı Forumu, “Caspian Innovation Forum” və iqtisadiyyatın fərqli istiqamətlərini əhatə edən beynəlxalq və milli forumlar, “meetup”lar və dəyirmi masalar təşkil edir.

1999-cu ildən fəaliyyət göstərən “Caspian Energy International Media Group” “Caspian Energy Club”ın dəstəyi ilə 30-dan çox elektron, çap və onlayn yerli və beynəlxalq media resurslarını idarə edir. “Caspian Energy International Media Group”un fəaliyyətinin flaqmanı olan “Caspian Energy” jurnalı dünyanın 70-dən çox ölkəsində yayımlanır və 20-dən çox ölkədə əlavə olaraq çap olunur.

2004-cü ildən “Caspian Energy Club”ın dəstəyi ilə fəaliyyət göstərən “Award Organizers Group” dünyanın 12 ölkəsində “Caspian Energy Award”, “Caspian Business Award”, “Brand Award”, “CEO Award” və digər milli və beynəlxalq mükafatların təqdimat mərasimlərinin və müsabiqələrinin təşkilatçısıdır.

1991-ci ildən fəaliyyət göstərən “Caspian Energy Research Group” PR, marketinq, sosioloji və ictimai rəy araşdırmaları aparan, transmilli, regional dövlət və iri özəl holdinqlər üçün konsaltinq xidmətləri göstərən investisiya-konsaltinq şirkətidir.

1991-ci ildən fəaliyyət göstərən “Caspian Energy Entertainment Group” “Caspian Energy CUP” çərçivəsində müxtəlif ölkələrdə idman yarışları, intellektual və əyləncə oyunları təşkil edən beynəlxalq şirkətdir.

“Caspian Energy Jobs” – Xəzər, Qara Dəniz və Baltik regionunda fəaliyyət göstərən vahid işə qəbul platformasıdır. Platforma işəgötürənlərə uyğun mütəxəssisləri tapmaq, iş axtaranlara isə tez və rahat şəkildə bir neçə şirkətə müraciət etmək imkanı yaradır.

Layihə ilkin mərhələdə xaricdə təhsil alan azərbaycanlı tələbələr üçün yaradılıb ki, onlar təhsillərini davam etdirərək part-time və ya remote iş tapa bilsinlər. Hal-hazırda bu platforma “Caspian Energy Holding” tərəfindən yaradılmış ekosistemə inteqrasiya edilir və dünyanın 100 ölkəsində fəaliyyət göstərməsi planlaşdırılır.