"Qlobal çağırışlar fonunda Azərbaycanın hüquq təhsili modeli" adlı panel müzakirə keçirilib
Bakı, 5 fevral, Günel Türksoy, AZƏRTAC
Fevralın 5-də "Paşa Holding"in təşkilatçılığı ilə "LEGİS Hüquq Forum"u çərçivəsində "Qlobal çağırışlar fonunda Azərbaycanın hüquq təhsili modeli" adlı panel müzakirə təşkil edilib.
AZƏRTAC xəbər verir ki, panel müzakirə ADA Universitetinin Hüquq fakültəsinin dekanı Rəşad İbadovun moderatorluğu ilə keçirilib.
Müzakirədə çıxış edən Vəkillər Kollegiyasının sədri Anar Bağırov Azərbaycanda hüquq forumu ilə bağlı mədəniyyətin mövcud olduğunu bildirib: "Hesab edirəm ki, burada səslənən hər çıxış düşünməyə vadar edir. Vəkillər Kollegiyası dinamik inkişaf edən bir institutdur. Hüquq fakültəsində təhsil alan xanımların sayı bəylərdən çoxdur. Ancaq xanımlar təhsillərini bitirdikdən sonra bu və ya digər səbəblərdən fəaliyyət göstərmirlər. Nəticə etibarilə, fəaliyyət göstərən hüquqşünasların sayı azalır. Hüquqşünas sayında artım olmalıdır. Hüquq müəllimləri universitetlərdə kifayət qədər əməkhaqqı almırlar, onlar başqa istiqamətdə fəaliyyət göstərirlər".
Azərbaycan Ədliyyə Akademiyasının rektoru Rövşən İsmayılov çıxışında uzun illər ərzində ölkəmizdə hüquq təhsilinin normativ xarakter daşıdığını, təhsilin normativ aktlar ətrafında formalaşdığını qeyd edib. O bildirib ki, müasir hüquqşünas təkcə qanunları bilməli deyil, onu tətbiq etməyi də bacarmalıdır.
Avropa İnsan Hüquqları Məhkəməsinin hakimi Lətif Hüseynov çıxışında hüquq sistemində olan bir sıra amillərin təhsilə təsir göstərdiyini qeyd edib. Onun sözlərinə görə, məhkəməyə və hüquq-mühafizə orqanlarına inam varsa, bu da hüquq təhsilinə müsbət təsir edəcək: " Əgər icra qrupu ilə vətəndaş arasında etibarlılıq problemi varsa, bu özünü hüquq təhsilində göstərəcək. Gələcək hüquqşünas bu tələbi bilən şəxsdir. Müasir hüquqşünas adaptiv hüququ düşüncəyə malik olmalıdır. Dəyərlərə hörmət etməli, tənqidi düşüncəyə malik olmalıdır".
Ali Məhkəmənin Mülki Kollegiyasının sədri Sənan Hacıyev qeyd edib ki, hüquq təhsilinin iki komponentin vəhdətindən ibarət olduğunu qeyd edib. O bildirib ki, bu təhsil və tərbiyə ilə bağlıdır: "Bəzən hüquqi bilikləri olan şəxsin hüquq mədəniyyətinin və mənəvi dəyərlərinin lazımi səviyyədə olmamasına rast gəlirik. Hüquq fakültələrində mütləq şəkildə mənəvi dəyərlərə diqqət artırılmalıdır".
Elm və təhsil nazirinin müavini Həsən Həsənli çıxışında qeyd edib ki, qanunları bilməmək məsuliyyətdən azad etmir. “Hüquq, beynəlxalq hüquq və tibbi ixtisaslarına qəbulun məhdudlaşdırılması qərarının nəticələrini görürük. Biz məqsədlərimiz barədə daha səmimi danışmağa başlamalıyıq. Bugünkü vaxt kəsiyində kəmiyyətlə bağlı problemi həll etməyə başlamışıq, keyfiyyətlə bağlı suallar isə qalır", - deyə o vurğulayıb.
Bölmənin digər xəbərləri
