® “TuranBank” DOST Agentliyi ilə birgə həssas qrupdan olan uşaqları sevindirib
Sosial məsuliyyətli bankçılıq prinsiplərinə sadiq qalan “TuranBank” 1 İyun - Uşaqların Beynəlxalq Müdafiəsi Günü münasibətilə növbəti aksiyaya imza atıb.
Belə ki, Bank DOST Agentliyinin “Könüllü DOST” proqramı çərçivəsində DOST İnklüziv İnkişaf və Yaradıcılıq Mərkəzinin dəstəyi ilə autizm və Daun sindromlu uşaqların, həmçinin şəhid ailələrinin övladlarının sosial inteqrasiyasının təşviqi, onların yaradıcılıq və bacarıqlarını inkişafı, həmçinin 1 İyun - Uşaqların Beynəlxalq Müdafiəsi Günü ilə əlaqədar cəmiyyətin diqqətini onların hüquqlarına və ehtiyaclarına yönəldilməsi məqsədilə tədbir keçirib.
Həssas kateqoriyadan olan 50 nəfər uşağın iştirak etdiyi tədbir 3 istiqamətdə davam edib. “Dünyanı öz rənginə boya!” şüarı ilə uşaqlar strafor materialdan hazırlanmış böyük dünya üzərində xəyal dünyalarını əks etdirən şəkillər çəkiblər. Tədbirin ikinci hissəsində isə uşaqlarla birgə DOST İnklüziv İnkişaf və Yaradıcılıq Mərkəzinin həyətində ekoterapiya məqsədilə güllər əkilib. Üçüncü hissədə “Ritm hər kəs üçündür!” rəqs master-klası keçirilib. Sonda uşaqlara istəklərinə uyğun müxtəlif hədiyyələr təqdim olunub.
Qeyd edək ki, “TuranBank” Korporativ Sosial Məsuliyyət proqramı çərçivəsində daim həssas əhali qruplarını diqqət mərkəzində saxlayır və dəstək olur. Bank bundan sonra da gələcəyimiz olan uşaqlara dəstək layihələrini, o cümlədən sosial həssas əhali qruplarının ehtiyaclarının qarşılanması üzrə aksiyalarını davam etdirəcək.
“TuranBank”
Bizimlə etibarlıdır....
Bölmənin digər xəbərləri
