ABŞ Avstraliyadan müdafiə xərclərini ÜDM-in 3,5 faizinə çatdırmasını tələb edir
Bakı, 2 iyun, AZƏRTAC
Vaşinqton Avstraliya hökumətindən müdafiə xərclərini mümkün qədər tez bir zamanda ümumi daxili məhsulunun (ÜDM) 3,5 faizinə çatdırmağı tələb edib.
AZƏRTAC xəbər verir ki, Pentaqonun mətbuat xidmətinin məlumatına görə, ABŞ müdafiə naziri Pit Heqset bu barədə müvafiq tələbi avstraliyalı həmkarı Riçard Marlzla Sinqapurda “Şanqri-La Dialoqu” forumu çərçivəsində baş tutan görüşündə səsləndirib.
“Pentaqon rəhbəri Pit Heqset Avstraliyanın hərbi xərclərinin qısa zamanda ümumi daxili məhsulunun 3,5 faizinə çatdırılmalı olduğunu bildirib”, - deyə ABŞ Müdafiə Nazirliyinin bəyanatında vurğulanır.
Həmçinin görüş zamanı tərəflər ABŞ-ın Avstraliyadakı hərbi mövcudluğunun artırılması, müdafiə sənayesi sahəsində əməkdaşlığın daha da inkişafı və təchizat zəncirinin dayanıqlığının gücləndirilməsi məsələlərini müzakirə ediblər.
Pit Heqset tərəfindən açıqlanan müdafiə xərclərinin həcmi NATO-nun Baş katibi Mark Rüttenin təşəbbüsünə uyğun gəlir. O, alyans ölkələrinin hərbi büdcələrinin ümumi daxili məhsullarının 3,5 faizinədək artırılmasını, həmçinin əlavə 1,5 faizinin müharibə dövründə istifadə oluna biləcək infrastrukturun inkişafına xərclənməsini təklif edir. Təşəbbüs iyunun sonunda NATO liderlərinin Haaqada keçiriləcək sammitində müzakirə olunacaq.
Qeyd edək ki, hazırda Avstraliyanın müdafiə xərcləri ümumi daxili məhsulun təxminən iki faizini təşkil edir. Kanberra 2033-cü ilədək bu göstəricini 2,3 faizə çatdırmağı planlaşdırır.
Bölmənin digər xəbərləri
