ABŞ ilə ticarət gərginliyi fonunda Çinin ixrac həcmi 7,2 faiz artıb
Bakı, 7 avqust, AZƏRTAC
İstehsalçılar Donald Trampın sərt rüsumlarının qüvvəyə minməsi ərəfəsində malları göndərmək üçün Pekin ilə Vaşinqton arasında kövrək tarif barışığından maksimum istifadə ediblər və bu səbəbdən Çinin ixracı iyul ayında bütün proqnozları üstələyib.
AZƏRTAC xarici mediaya istinadla xəbər verir ki, qlobal treyderlər və investorlar dünyanın iki ən böyük iqtisadiyyatının avqustun 12-dək davamlı ticarət sazişi üzərində razılaşa biləcəyini və ya qlobal təchizat zəncirlərinin idxal rüsumlarının əvvəlki vəziyyətinə qaytarılacağını gözləyirlər.
ABŞ Prezidenti Donald Tramp cümə axşamı qüvvəyə minən tranzit qovşaqları vasitəsilə ABŞ-a göndərilən mallara 40 faizlik rüsum, eləcə də çiplər və əczaçılıq məhsullarına 100 faizlik tariflər, habelə Rusiya neftini alan ölkələrdən gələn mallara əlavə 25 faiz vergi tətbiq edib.
Avqustun 7-nə olan gömrük məlumatlarını “Reuters” agentliyinə şərh edən iqtisadçılar bildiriblər ki, bu ay 7,2 faizə çatan Çinin ixrac həcmi proqnozlaşdırılan 5,4 faizi xeyli üstələyib.
Dünyanın ən böyük istehlak bazarı olan ABŞ ilə Çinin ticarət müharibəsi üzrə barışığının müddəti gələn həftə başa çatır, baxmayaraq ki, Tramp Rusiyadan alınan karbohidrogenlərin davamlı tədarükünə görə Pekinə əlavə rüsumların tətbiq oluna biləcəyinə işarə vurub.
“Economist Intelligence Unit”in baş iqtisadçısı Hu Tyançen bildirib ki, ticarət məlumatları Cənub-Şərqi Asiya bazarlarının ABŞ-Çin ticarətində getdikcə daha mühüm rol oynadığını göstərir. O əlavə edib: “Ancaq hər şey Trampın dayandırmaq istədiyi yükdaşımaları ilə bağlı deyil, ASEAN ölkələri də ABŞ-a hazır məhsul ixrac etməzdən əvvəl Çindən xammal və komponentlər idxal edir”.
Məlumata görə, Çinin ABŞ-a ixracatı keçən ay əvvəlki ilə nisbətən 21,67 faiz azalıb, eyni dövrdə ASEAN ölkələrinə mal tədarükü isə 16,59 faiz artıb. Tramp çərşənbə axşamı ABŞ-ın Çinlə ticarət razılaşmasına yaxın olduğunu və dünyanın iki ən böyük iqtisadiyyatı razılığa gələ bilsə, ilin sonuna qədər çinli həmkarı Si Cinpin ilə görüşəcəyini bəyan edib.
Çinin iyul ayına keçən ticarət profisiti iyunda 114,77 milyard dollardan 98,24 milyard dollara qədər daralıb. ABŞ Ticarət Departamentinin İqtisadi Təhlil Bürosunun məlumatları iki ölkə arasında ticarət fərqinin iyun ayında son 21 ilin ən aşağı səviyyəsinə endiyini göstərir.
Bölmənin digər xəbərləri
