ABŞ-ın Con Batçelor Şou proqramında Azərbaycanın milli bayramı – Respublika Günündən danışılıb
Vaşinqton, 30 may, AZƏRTAC
ABŞ-ın Con Batçelor Şou proqramında “Bu gün 101 yaşı olan Azərbaycanın Respublika Günü mübarək!” adlı müsahibə yayımlanıb.
Azərbaycan Respublikasının milli günü münasibətilə səfir Elin Süleymanovdan müsahibə götürən Con Batçelor ABŞ Prezidentinin Azərbaycan Prezidentinə və xalqına təbrikini xatırladıb. O, 1918-ci il mayın 28-də Azərbaycanın müstəqilliyinin elan olunduğunu və Azərbaycan Demokratik Respublikasının yarandığını qeyd edib.
Azərbaycan Demokratik Respublikasının yaranmasının 101-ci ildönümü günündə danışmaqdan şərəf duyduğunu bildirən Elin Süleymanov müsəlman çoxluğa malik ilk respublikanın yaranmasının əlamətdar hadisə olduğunu qeyd edib. O, ADR-in irqindən, milliyyətindən və cinsindən asılı olmayaraq, hər kəsə, hətta o dövrün aparıcı dövlətlərindən daha tez bərabər seçki hüququnu verməsindən bəhs edib. Səfir Azərbaycan xalqının demokratik respublikanın qurucularına qoyduqları mirasa görə əbədi olaraq minnətdar olduqlarını bildirib, Prezident İlham Əliyevin demokratik Cümhuriyyətin ideya və prinsiplərinə sadiq olduğunu qeyd edib. O, Prezident İlham Əliyevin uğurlu siyasəti nəticəsində müasir Azərbaycanın mütərəqqi, dünyəvi və bütün xalqlara açıq olan dövlətə çevrilməsindən bəhs edib. Diplomat əminliklə bildirib ki, Azərbaycanın müstəqil dövlət olaraq bünövrəsini qoymuş Cümhuriyyət baniləri bugünkü Azərbaycanla fəxr edərdilər. Səfir ABŞ Prezidenti Donald Tramp, həmçinin dövlət katibi Mayk Pompeo tərəfindən təbriklərin və bu təbriklərdə 28 may tarixinin əhəmiyyətinin qeyd olunmasının əlamətdar hal olduğunu qeyd edib. O, Respublika Günü ilə bağlı təbriklərə görə onlara öz təşəkkürünü bildirib. Səfir bir sıra dünya dövlətlərinin rəhbərlərinin ölkəmizi bu əlamətdar gün münasibətilə təbrik etdiyini diqqətə çatdırıb. Cəmi 23 ay yaşamasına baxmayaraq, ADR-in Azərbaycan dövlətinin bünövrəsini qoyduğunu və xalqı ilhamlandırdığını bildirib.
Elin Süleymanov 28 may tarixinin, həmçinin ADR ilə ABŞ arasında ilk diplomatik əlaqələrin qurulması ilə əlamətdar olmasına toxunub. Belə ki, 1919-cu ilin 28 may tarixində ADR nümayəndə heyəti ABŞ Prezidenti Vudro Vilsonla görüşmüş və ABŞ Prezidenti daha sonra onlar barədə fikirlərini bölüşərkən “Mən bizimlə eyni düşünən insanları gördüm” deyə bildirmişdir.
Jurnalist 1918-ci ildə Azərbaycan ərazisində ermənilər tərəfindən soyqırımının törədildiyini təəssüf hissi ilə xatırladıb. Səfir hər dəfə Azərbaycanda müstəqillik cəhdlərinə qarşı təxribatlar törədildiyini, 1991-ci ildə Azərbaycanın yenidən müstəqillik qazanması ərəfəsində də soyqırımı ilə üzləşdiyini, vətəndaşların öz doğma torpaqlarından qaçqın və didərgin düşdüyünü xatırladıb. Ölkəmizin tarixdən dərs çıxardığını bildirən səfir Ermənistanın qonşu ölkələrlə pis münasibətinin, konstruktiv sülh danışıqlarını rədd etməsinin Ermənistan və erməni xalqı üçün heç də yaxşı gələcək vəd etmədiyini qeyd edib. Səfir region ölkələrinin rifahı üçün sülhə nail olunmasının və bundan irəli gələrək birgə əməkdaşlıqdan bütün tərəflərin fayda görməsinin əhəmiyyətini vurğulayıb.
Müsahibədə Azərbaycanın ABŞ-ın strateji tərəfdaşı olmasından, zəngin enerji yataqlarına malik ölkəmizin ABŞ-ın Avropadakı müttəfiqlərinin enerji təchizatına töhfə verməsindən bəhs edilib. ABŞ-ın bu enerji layihələrinə göstərdiyi dəstəyin əhəmiyyətini vurğulayan səfir 1 həftə öncə - 22 may tarixində Yunanıstan və Bolqarıstan arasında qaz əlaqələndiricisi layihəsinin təməlqoyma mərasiminin keçirildiyini xatırladıb, bu layihənin Cənub Qaz Dəhlizinin vacib hissəsi olduğunu qeyd edib. Türkiyə, Yunanıstan, Albaniya, İtaliya kimi Avropa ölkələrinə qaz nəqlini nəzərdə tutan Cənub Qaz Dəhlizinə artıq Bolqarıstanın da qoşulduğunu bildirib.
Azərbaycan diplomatik xidmət orqanlarının 100 illiyi və diplomatik xidmət əməkdaşlarının peşə bayramının yaxınlaşdığını qeyd edən səfir belə əlamətdar tarixlərin qeyd edilməsinin xoş olduğunu deyib və bundan sonra daha çox tarixlərin qeyd ediləcəyinə ümidini ifadə edib.
Müsahibənin tam versiyası ilə https://audioboom.com/posts/7274582-happy-republic-day linkindən tanış olmaq mümkündür.
Con Batçelor Şou gündəlik həyatda aktual olan beynəlxalq hərbi, siyasi və iqtisadi mövzulara həsr edilir. Həftənin hər günü yayımlanan bu şou ABŞ-da milyonlarla dinləyici auditoriyasına malikdir.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
