ABŞ-ın nəhəng kimya məhsulları konserni Almaniyadakı bəzi istehsal sahələrini bağlayır
Berlin, 7 iyul, AZƏRTAC
ABŞ-ın kimya məhsulları üzrə nəhəng şirkətlərindən olan “Dow” konserni 2027-ci ilin sonunadək Almaniyadakı bəzi istehsal sahələrini bağlayacaq.
AZƏRTAC yerli mediaya istinadla xəbər verir ki, Saksoniyadakı Böhlen və Saksoniya-Anhaltın Şkopau şəhərlərindəki bəzi istehsal sahələrinin bağlanmasının səbəbləri Avropa bazarındakı struktur problemləri, o cümlədən yüksək enerji və istismar xərcləri, eləcə də əsas sənaye sahələrində tələbatın azalmasıdır. “Dow” artıq bu qərarı ondan təsirlənən müəssisələrdə çalışan işçilərə çatdırıb. Bu qərar nəticəsində Böhlen və Şkopaudakı 550 daimi iş yeri ləğv ediləcək.
“Dow” Şkopau, Leuna və Böhlendə plastik və tikinti sənayesi üçün materialların istehsalını davam etdirir. Şirkətin bu sahələrin bağlanma qərarından təsirlənmədiyi açıqlanıb. Şirkətin Almaniyadakı 13 müəssisəsində ümumilikdə 3400-dək əməkdaş çalışır.
AZƏRTAC-ın xüsusi müxbiri
Berlin
Bölmənin digər xəbərləri
