ABŞ-ın rüsumları Banqladeşin tekstil sənayesini xeyli zəiflədə bilər
Bakı, 9 iyul, AZƏRTAC
ABŞ Prezidenti Donald Trampın Cənubi Asiya ölkəsinə tətbiq etdiyi 35 faizlik tarifin əsas ixrac bazarından gələn sifarişləri təhdid etdiyi və ölkənin ən böyük sənayesini iflasa uğratdığı bir şəraitdə Banqladeşin geyim fabriklərində iş yerlərinin itirilməsi qorxusu yayılır.
AZƏRTAC xəbər verir ki, tekstil sektoru Banqladeşin ümumi ixrac gəlirlərinin 80 faizindən çoxunu təşkil edir. Bu sahədə 4 milyon nəfər işləyir və illik ÜDM-ə təxminən 10 faiz töhfə verir.
Banqladeşin baş müşaviri Məhəmməd Yunusa yazdığı məktubda Donald Tramp avqustun 1-dən bu ölkədən idxal olunan mallara 35 faizlik rüsum tətbiq ediləcəyini bildirib. “Reuters” agentliyi xəbər verir ki, bu, aprel ayında ABŞ Prezidentinin elan etdiyi 37 faizlik tarifdən bir qədər aşağıdır, lakin əvvəllər qüvvədə olan orta hesabla 15 faizdən iki dəfə çoxdur.
ABŞ Prezidenti əsas geyim ixracatçısı olan Vyetnama 20 faizlik rüsum tətbiq edəcəyini bildirib. ABŞ-ın əsas təchizatçıları olan Hindistan və Şri-Lanka üçün tariflər hələ açıqlanmayıb. Bu rəqib ölkələr üçün aşağı tariflər Banqladeş tekstil məhsullarını daha da bahalaşdıracaq.
Banqladeş hökumətinin təmsilçiləri və ABŞ-ın ticarət nümayəndəsi arasında çərşənbə günü ticarət sazişi üzrə danışıqların ikinci raundu başlayacaq.
Bölmənin digər xəbərləri
