ABŞ jurnalı: Firon II Tutmosun məqbərəsinin üzə çıxarılması bu ilin ən mühüm tapıntılarındandır
Qahirə, 20 dekabr, AZƏRTAC
Amerika Birləşmiş Ştatlarının (ABŞ) “Archaeology” jurnalı 2025-ci ilin ən mühüm 10 arxeoloji tapıntısı müəyyən edib.
Misirin Luksor bölgəsində bu il üzə çıxarılan firon II Tutmosun məqbərəsi də bu siyahıya salınıb. Jurnalın növbəti - yanvar-fevral nömrəsinin üz qabığında abidə daxilindəki yazıların şəkli həkk olunub.
AZƏRTAC xəbər verir ki, abidə 1922-ci ildə Tutanxamonun məqbərəsinin üzə çıxarılmasından bəri 18-ci ailəyə aid tapılmış ilk firon məqbərəsi sayılır.
Qeyd olunur ki, fironun məqbərəsi Misir-Britaniya birgə arxeoloji ekspedisiyası tərəfindən Luksor şəhərinin qərbində Tıba dağında üzə çıxarılıb.
Əvvəlcə arxeoloqlar tapılan məqbərənin Tutmosların arvadlarından birinə aid olduğunu düşünüblər. Belə ki, abidə firon III Tutmosun arvadlarına aid məqbərənin, eləcə də Hatşepsutun qəbrinin yaxınlığında yerləşir. Lakin qazıntıların miqyası genişləndikdən sonra üzə çıxarılan digər faktlar onun firon II Tutmosa aid olduğunu sübut edib.
Qazıntılar zamanı, həmçinin Am-Duat (Axirət) kitabının mətnlərinin yazıları və digər naxışlı artefaktlar tapılıb.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
