ABŞ-KXDR danışıqlarının yeni raundu bir neçə həftədən sonra başlaya bilər
Bakı, 5 mart, AZƏRTAC
ABŞ-ın dövlət katibi Maykl Pompeo bir neçə həftədən sonra Pxenyanda ABŞ-KXDR danışıqlarının yeni raundunun keçirilə biləcəyini deyib.
AZƏRTAC xarici KİV-lərə istinadla xəbər verir ki, Dövlət Departamentinin rəhbəri bu barədə Ayova ştatında kənd təsərrüfatı sahəsinin nümayəndələri ilə görüşündə bildirib.
Ötən həftə Hanoyda keçirilmiş ABŞ-KXDR sammitindən sonra Pompeo yaxın zamanlarda iki tərəfin yenidən görüşəcəyinə ümidvar olduğunu demişdi. Onun sözlərinə görə, danışıqlara yenidən köklənmək üçün hər iki tərəfə müəyyən vaxt lazım gələcək. ABŞ-ın dövlət katibi, həmçinin Vaşinqton və Pxenyanın Koreya yarımadasının nüvəsizləşdirilməsi üzrə ümumi mövqelərinin mövcudluğunu vurğulamışdı.
Xatırladaq ki, ikinci ABŞ-KXDR sammiti vaxtından əvvəl başa çatıb və tərəflər sazişə nail ola bilməyiblər. ABŞ Prezidenti Donald Tramp və Şimali Koreya lideri Kim Çen In bir neçə görüşdən, o cümlədən təkbətək danışıqlardan sonra birgə sənəd imzalamaqdan imtina ediblər. Bununla yanaşı, dialoqu davam etdirmək barədə razılıq əldə olunub.
Bölmənin digər xəbərləri
