ABŞ Rusiyanın enerji sektoruna qarşı yeni sanksiyalar tətbiq etməyi planlaşdırır
Bakı, 17 dekabr, AZƏRTAC
Birləşmiş Ştatlar Rusiyanın enerji sektoruna qarşı yeni sanksiyaları nəzərdən keçirir. Moskva Ukrayna böhranının həlli ilə bağlı təklifləri rədd etdiyi təqdirdə, bu sanksiyalar tətbiq oluna bilər.
AZƏRTAC xəbər verir ki, bu barədə “Bloomberg” agentliyi mənbələrinə istinadla məlumat yayıb.
Bildirilir ki, yeni sanksiyalar sülh planına dair müzakirələr fonunda Moskvaya təzyiqi artırmaq üçün hazırlanır. Birləşmiş Ştatlar Rusiya neftinin nəqli üçün istifadə edilən “kölgə donanması” gəmilərini, habelə sanksiyalardan yan keçən ticarət şirkətlərini hədəfə almaq kimi variantları araşdırır.
Agentliyin həmsöhbətlərinin dediyinə görə, tədbirlər bu həftənin əvvəlində açıqlana bilər. Bununla belə, qərar Prezident Donald Trampdan asılıdır.
ABŞ-ın maliyyə naziri Skott Bessentin bu məsələni bir neçə gün əvvəl Avropa İttifaqı ölkələrinin 27 səfiri ilə müzakirə etdiyi də bildirilir.
Bölmənin digər xəbərləri
