ABŞ Səudiyyə Ərəbistanına təxminən 2 milyard dollarlıq raket tuşlama sistemlərinin satışını təsdiqləyib
Bakı, 16 iyul, AZƏRTAC
ABŞ Dövlət Departamenti Səudiyyə Ərəbistanına ümumi dəyəri 1,96 milyard dollar olan 20 minədək raket tuşlama dəstinin mümkün satışını təsdiqləyib.
AZƏRTAC xəbər verir ki, bu barədə ABŞ Dövlət Departamentinin yaydığı bəyanatda bildirilir.
Məlumata görə, Səudiyyə Ərəbistanı ABŞ-dən hava-hava tipli raketlər üçün 10 min, hava-yer tipli raketlər üçün isə daha 10 min APKWS-II (Advanced Precision Kill Weapon System) lazer tuşlama dəstinin alınmasına icazə istəyib. Dövlət Departamenti sözügedən mümkün satışa razılıq verib.
Paketə, həmçinin LAU-131 A/A buraxılış qurğuları, Mk-152 döyüş başlıqları və digər müşayiətedici maddi-texniki təminat vasitələri daxildir. Əsas podratçının “BAE Systems” şirkəti olacağı gözlənilir.
ABŞ administrasiyası silah satışının mümkün təsdiqi ilə bağlı qərar barədə artıq Konqresi məlumatlandırıb. ABŞ qanunvericiliyinə əsasən, Konqresin sövdələşməni nəzərdən keçirmək və zərurət yaranacağı təqdirdə onun qarşısını almaq üçün 30 gün vaxtı var.
Bölmənin digər xəbərləri
