ABŞ və Aİ xarici turistlər üçün viza qiymətlərini kəskin qaldırır
Bakı, 22 iyul, AZƏRTAC
ABŞ və Aİ xarici turistlər üçün viza qiymətlərini kəskin qaldırır. Belə ki, Avropa Komissiyasının qərarına əsasən, vizadan azad olan ölkələrin vətəndaşları üçün məlumatlandırma sistemindən istifadə, habelə vizadan imtina üçün 20 avro ödəniş tələb olunacaq, ABŞ isə əcnəbilər üçün vizanın qiymətinə 250 dollarlıq tarif tətbiq edir.
AZƏRTAC xarici mediaya istinadla xəbər verir ki, Avropa Komissiyası ETIAS sistemini (Avropa Səyahət Məlumatı və Avtorizasiya Sistemi) tətbiq edir və ondan istifadə haqqını 7 avrodan 20 avroya qədər əhəmiyyətli dərəcədə artırdığını elan edib. Yeni tarif 30 Avropa ölkəsinə 90 günə qədər qısamüddətli səfərlər planlaşdıran vizadan azad olan ölkələrin vətəndaşlarına şamil ediləcək.
ETIAS İrlandiya, həmçinin İslandiya, Norveç, Lixtenşteyn və İsveçrə istisna olmaqla, Aİ-nin bütün üzv dövlətlərini əhatə edəcək. Sistemin 2026-cı ildə tam istifadəyə verilməsi planlaşdırılır. Təklif hazırda Aİ Şurası və Avropa Parlamenti tərəfindən nəzərdən keçirilir.
Komissiya bildirir ki, rüsum artımı əməliyyat xərclərini inflyasiyaya uyğun ödəmək və Aİ ödənişlərini digər ölkələrdəki analoji proqramlara uyğunlaşdırmaq üçün lazımdır. İstisnalar 18 yaşdan kiçik və 70 yaşdan yuxarı səyahət edənlər üçün qalacaq və onlar pulsuz olmaqda davam edəcək.
ABŞ isə viza bütövlüyü rüsumunu tətbiq edir. Birləşmiş Ştatların Daxili Təhlükəsizlik Departamenti xarici ölkə vətəndaşlarına qeyri-immiqrasiya vizaları verərkən əlavə rüsum tətbiq edəcək. Minimum məbləğ 250 dollar müəyyən edilib, lakin departament onun məbləğini öz mülahizəsinə görə qaldıra bilər. Rüsum hər il inflyasiyaya uyğun artırılacaq.
Yığılan bütün vəsait ümumi xəzinəyə daxil olacaq və heç bir güzəşt və ya endirim nəzərdə tutulmur. Bununla belə, viza sahibi bütün şərtlərə əməl edərsə və ABŞ-ı vaxtında tərk edərsə, viza müddəti bitdikdən sonra pulun geri qaytarılmasını tələb edə biləcək.
Bölmənin digər xəbərləri
