ABŞ və Çin ticarət barədə sazişə yaxınlaşır
Bakı, 4 mart, AZƏRTAC
ABŞ və Çin ticarət məsələlərinə dair məsləhətləşmənin son mərhələsindədir. Martın sonlarında saziş əldə oluna bilər.
AZƏRTAC “The Wall Street Journal” nəşrinə istinadla xəbər verir ki, Pekin Amerikanın kənd təsərrüfatı və kimya məhsullarına, həmçinin avtomobil sənayesi məhsullarına gömrük rüsumunu və digər məhdudiyyətləri azaltmağı təklif edir. Birləşmiş Ştatlar isə öz növbəsində ötən il Çindən gətirilən məhsullara tətbiq edilən ticarət məhdudiyyətlərinin böyük hissəsini aradan qaldırmaq barədə düşünür.
Hələ bəzi mübahisəli məsələlər həll olunmamış qalsa da, tərəflər arasında saziş konkret forma alır. İki ölkə arasında saziş əldə olunması ABŞ və Çin liderləri Donald Tramp və Si Cinpinin martın 27-də baş tutması gözlənilən görüşü zamanı elan edilə bilər.
Xatırladaq ki, 2018-ci il dekabr ayının əvvəlində Donald Tramp və Si Cinpin arasında Buenos-Ayresdə G20 sammiti çərçivəsində keçirilən görüşdə ticarət məsələlərinə dair bəzi razılaşmalar əldə edilmişdi. Vaşinqton Çin məhsullarına rüsumun artırılmasını təxirə salmış, Pekin isə Birləşmiş Ştatlardan idxalı artırmağa razı olmuşdu. Həmçinin tərəflər 3 ay müddətində iki ölkə arasında ticarət sazişi bağlanması istiqamətində tədbirlər görmək barədə razılığa gəlmişdilər.
Bölmənin digər xəbərləri
