“Abşeronneft” NQÇİ-nin dəniz yataqlarında ekoloji monitorinq aparılmışdır
Bakı, 24 iyun (AZƏRTAC). Azərbaycan Respublikası Dövlət Neft Şirkətinin (ARDNŞ) Ekologiya İdarəsinin ekoloji monitorinq departamentinin ekoloji tədqiqatlar ekspedisiyasının əməkdaşları “Azneft” İstehsalat Birliyinin “Abşeronneft” neft-qaz çıxarma idarəsinin (NQÇİ) “Qərbi Abşeron” və “Gürgan dəniz” yataqlarında ekoloji monitorinq aparmışlar.
AZƏRTAC xəbər verir ki, monitorinqə başlamamışdan əvvəl ekspedisiyanın üzvləri dəniz şəraitində işin xüsusiyyəti, ehtimal olunan risklərin qiymətləndirilməsi, təhlükəsizlik tələblərinin yerinə yetirilməsi sahəsində təlimatlandırılmışlar. Ekspedisiya rəhbəri tərəfindən iş bölgüsü aparılmış və müvafiq fərdi mühafizə vasitələrindən istifadə etməklə ekoloji monitorinq işləri həyata keçirilmişdir.
Monitorinq müddətində Xəzər dənizinə təsir edən parametrlərin müəyyənləşdirilməsi üçün sözügedən yataqların ərazilərində nəzərdə tutulmuş stansiyalarda dəniz suyu, zooplankton, fitoplankton və dib çöküntüsü nümunələri götürülmüşdür.
Monitorinq zamanı, həmçinin su mühitinin fiziki-kimyəvi xarakteristikası öyrənilmiş, dəniz axınlarının sürət və istiqaməti ölçülmüş, ərazinin meteoroloji tədqiqatı aparılmışdır. Geniş təhlillərin aparılması və məlumatların elmi əsaslandırılması üçün toplanmış tədqiqat materialları Ekologiya İdarəsinin kompleks tədqiqatlar laboratoriyasına təhvil verilmişdir.
Götürülmüş nümunələr kompleks tədqiqatlar laboratoriyasında analiz edildikdən sonra, alınmış nəticələrə əsasən analitik təhlillərin aparılması nəzərdə tutulmuşdur.
Bölmənin digər xəbərləri
