ADY: Azərbaycanda dəmir yollarının “karbon izi” elə də çox deyil
Bakı, 5 dekabr, AZƏRTAC
Bu gün bütün dünyada, o cümlədən Azərbaycan nəqliyyatında dekarbonizasiya xüsusi əhəmiyyət kəsb edir. Azərbaycan yaşıl iqtisadiyyata transformasiya edərək bu proseslərin önündə gedir.
AZƏRTAC xəbər verir ki, bunu “Azərbaycan Dəmir Yolları” QSC-nin (ADY) Kommunikasiya departamentinin müdiri Turxan Əhmədov jurnalistlərə açıqlaması zamanı deyib.
Onun sözlərinə görə, Asiya İnkişaf Bankı (AİB) ilə “Azərbaycan Dəmir Yolları”nın birgə həyata keçirəcəyi dekarbonizasiya layihəsi çox əhəmiyyətlidir.
“Azərbaycanda dəmir yollarının “karbon izi” elə də çox deyil. Buna baxmayaraq, AİB layihənin həyata keçirilməsi ilə bağlı məhz "Azərbaycan Dəmir Yolları"nı seçib. ADY-nin dekarbonizasiya baxımından çox mühüm imkanları var. İstər bərpaolunan enerjinin inkişafı, əldə olunması baxımından, istərsə də enerji səmərəliliyi məsələlərinin daha da yaxşılaşdırılması baxımından imkanlar mövcuddur. Azərbaycanın nəqliyyat sektorunun qovşaq kimi formalaşdığı dövrdə dekarbonizasiya layihəsinin tamamlanması nəticəsində ölkənin dəmir yolları daha səmərəli, daha ekoloji, təmiz və daha etibarlı nəqliyyat vasitəsinə çevriləcək”, - deyə Turxan Əhmədov vurğulayıb.
Bölmənin digər xəbərləri
