Ağayar Axundzadə: Qarşıda duran əsas hədəf Paris Olimpiadasına ciddi hazırlaşmaqdır
Bakı, 7 dekabr, AZƏRTAC
Koronavirus pandemiyasının yaratdığı çətinliklərə baxmayaraq, cüdoçularımız bu il Tokio Olimpiadası da daxil olmaqla, dünya və Avropa çempionatlarında, eləcə də Beynəlxalq Cüdo Federasiyasının illik təqvim planında nəzərdə tutulan digər yarışlarda iştirak ediblər. Təbii ki, məhdudiyyətlərin hökm sürdüyü şəraitdə yarışlara hazırlıq xarakteri daşıyan təlim-məşq prosesinə çoxlu sayda cüdoçu cəlb etmək mümkün olmayıb. Bu isə ilk növbədə, cüdoçuların sparrinq görüşlər keçirməsinə mane olub. Buna baxmayaraq, istər əsas yığmamız, istər yeniyetmə və gənc cüdoçularımız, istərsə də veteranlarımız və paracüdoçularımız beynəlxalq arenalarda öz sözlərini deyə biliblər.
Bu sözləri Azərbaycan Cüdo Federasiyasının icraiyyə komitəsinin üzvü Ağayar Axundzadə AZƏRTAC-a məxsusi müsahibəsində deyib.
Cari ildə cüdoçularımız üçün ən məsul yarışın Tokio Olimpiadası olduğunu vurğulayan A.Axundzadə idmançılarımızın dördilliyin zirvə yarışının startına qədər Avropa və dünya çempionatlarında uğurla çıxış etdiklərini vurğulayaraq bildirib: “Cüdoçularımız Tokio Olimpiadasından əvvəl qatıldıqları dünya və Avropa çempionatlarında heç də pis çıxış etməmişdilər. Ona görə də biz cüdoçularımızın “Tokio-2020”də də yaxşı çıxış edəcəklərini gözləyirdik. Amma cüdoçularımız öz potensiallarından tam istifadə edə bilmədilər. Əslində, biz Olimpiadaya yollanan kişi cüdoçularımızdan Kəramət Hüseynov (60 kq), Orxan Səfərov (66 kq), Rüstəm Orucov (73 kq) və Məmmədəli Mehdiyedən (90 kq), qadınlardan isə İrina Kindzerskadan (+78 kq) medal gözləyirdik. Çünki adlarını çəkdiyim cüdoçuların hamısı Olimpiadadan əvvəl öz çəki dərəcələrinin favoritləri kimi dəyərləndirilirdi. Buna baxmayaraq, cüdoçularımızdan yalnız İrina Kindzerska fərqlənə bildi”.
Cüdoçularımızın uğursuz çıxışının əsas səbəbkarının həmin dövrdə yığmanın baş məşqçisi postunu tutan Ruslan Maşurenkonun olduğunu qeyd edən A.Axundzadə deyib: “Məşqçilər heyəti işlərini elə qurmalıydılar ki, idmançılar yorulmasın və bütün görüşlərə qələbə ruhunda çıxa bilsinlər. Təsəvvür edin ki, dünya çempionatında uğurla çıxış edən Kəramət Hüseynov Tokioda fərqlənə bilmədi. Olimpiada istisna olmaqla, cüdoçularımızın digər yarışlardakı uğurlarını nəzərə alsaq, 2021-ci ili qənaətbəxş hesab etmək olar. Belə ki, Azərbaycan cüdoçuları 2021-ci ildə qatıldıqları Olimpiya və Paralimpiya Oyunları da daxil olmaqla, dünya və Avropa çempionatlarında, eləcə də digər beynəlxalq yarışlarda (“Böyük dəbilqə”, Qran-Pri, 1-ci MDB Oyunları və Məktəblilərin Dünya Oyunları) 86 medal qazanıblar. Bu medallardan 23-ü qızıl, 24-ü gümüş və 39-u bürüncdür”.
A.Axundzadə cüdonun artıq bütün dünyada yüksək templə inkişaf etdiyini və bu səbəbdən də beynəlxalq arenalarda medallar qazanmağın daha da çətinləşdiyini bildirib: “Əvvəllər cüdo ölkələri barmaqla sayılırdı. Amma indi hansı ölkəyə nəzər yetirsəniz, həmin ölkədə cüdonun inkişaf etdiyini görə bilərsiniz. Bu isə cüdoçular arasında rəqabətin daha da güclənməsinə səbəb olub. Bu vəziyyətdə isə medal qazanmaq çətinləşir. Artıq bölgələrimizdə də cüdo inkişaf edir. Əvvəllər ölkə birinciliyinə rayon komandaları ayrıca gəlirdilərsə, indi regionlarda da yarışlar keçirilir və onlar region yığması olaraq respublika yarışına qatılırlar. Bütün bunlar hamısı cüdonun bölgələrdə də inkişafından xəbər verir. Bu il Zaqatalanın Muxax kəndindən olan cüdoçumuz yığma komandanın heyətində Avropa çempionu oldu. Bunun özü də cüdonun inkişafının göstəricisidir. Hesab edirəm ki, bu idman növü ölkəmizdə geniş yayıldıqca nəticələrimiz daha da çox olacaq. Elə etməliyik ki, Bakı, Sumqayıt və Gəncə kimi digər bölgələrimizdə də cüdo inkişaf etsin”.
A.Axundzadə onu da bildirib ki, gələcəkdə cüdoçuların qarşısında duran əsas vəzifə Paris Olimpiadasına yüksək səviyyədə hazırlaşmaq və dördilliyin zirvə yarışında uğurla çıxış etməkdir. Hələ iki ildən də artıq vaxtımız var. Ümid edirəm ki, məşq prosesini səmərəli keçirməklə növbəti Olimpiadaya yüksək səviyyədə hazırlaşa biləcəyik.
Bölmənin digər xəbərləri
