Aİ iqlim dayanıqlığı və su təhlükəsizliyi layihələrinə 86 milyon avro investisiya qoyur
Bakı, 18 aprel, AZƏRTAC
Avropa İttifaqı təmiz suyun keyfiyyətini və əlçatan olmasını yaxşılaşdıracaq, çirklənmiş çayları təmizləyəcək, yanğın və daşqınlara qarşı mühafizəni gücləndirəcək və istixana qazı emissiyalarını azaldacaq yeni strateji inteqrasiyalı layihələrin həyata keçirilməsinə 86 milyon avro ayıracaq.
AZƏRTAC xəbər verir ki, bu barədə məlumat Avropa Komissiyasının rəsmi saytında yerləşdirilib.
Rəsmilər bildiriblər ki, 2023-cü il müsabiqəsi çərçivəsində seçilən layihələrə maliyyə ayrılacaq. Onlar Danimarka, Estoniya, Polşa, Sloveniya və İslandiyada həyata keçirilir.
Layihələr milli, regional və yerli hakimiyyət orqanlarına milli və Avropa ekoloji və iqlim qanunvericiliyini həyata keçirməyə kömək edəcək. Avropa Komissiyası onlardan, həmçinin Aİ-nin digər maliyyə mənbələrindən əhəmiyyətli əlavə investisiyaların səfərbər edilməsini gözləyir. Bunlara kənd təsərrüfatı, struktur, regional və tədqiqat fondları, həmçinin milli fondlar və özəl sektor investisiyaları daxildir.
Bölmənin digər xəbərləri
