AKTA: Uşaqların sosial şəbəkələrdə təhlükəsizliyinin təmin olunması istiqamətində sistemli iş aparılacaq
Bakı, 20 aprel, AZƏRTAC
Azərbaycanda uşaqların və yeniyetmələrin internetdə, xüsusilə sosial şəbəkələrdə təhlükəsizliyinin təmin olunması istiqamətində sistemli iş aparılacaq.
Bu fikirləri AZƏRTAC-a açıqlaması zamanı Azərbaycan Kibertəhlükəsizlik Təşkilatları Assosiasiyasının (AKTA) icraçı direktoru Rauf Cabarov deyib.
Onun sözlərinə görə, sosial şəbəkələrin geniş yayılması uşaqların kibertəhlükəsizliyi məsələsini daha da aktuallaşdırıb.
“Bir çox sosial platformalarda yaş məhdudiyyəti mövcuddur və bu məhdudiyyətlər adətən 16-18 yaş aralığını əhatə edir. Əslində bütün sosial şəbəkə sahibləri – “Meta” şirkəti, “TikTok” və digərləri həmişə müəyyən yaş həddi qoyublar. Yetkinlik yaşına çatmış şəxsin özünü təsdiq etməsi tələb olunur. Sadəcə əvvəlki dövrlərdə bu qaydalara tam riayət olunmurdu və uşaqlar daha rahat şəkildə qeydiyyatdan keçə bilirdilər. Bu gün isə platforma sahibləri də anlayırlar ki, bu məsələlər daha da sərtləşdirilməlidir”, – deyə R.Cabarov vurğulayıb.
AKTA rəsmisi qeyd edib ki, bu məsələ yalnız platforma sahiblərinin deyil, həm də dövlətlərin və hökumətlərin məsuliyyətidir. Çünki əsas məqsəd vətəndaşların, xüsusilə uşaqların qorunmasıdır: “İnformasiya təhlükəsizliyi və kibertəhlükəsizlik strategiyasında uşaqların sosial şəbəkələrdən və internet mühitindən qorunması ilə bağlı xüsusi müddəalar yer alıb. Bundan əlavə, fevral ayında Prezident İlham Əliyevin imzaladığı sənəddə də uşaqların və yeniyetmələrin internetdə təhlükəsizliyinin təmin olunması məsələsinə xüsusi diqqət ayrılıb. Artıq bu istiqamətdə aidiyyəti qurumlar – tərəfindən müəyyən addımlar atılır. Bu məsələ həmişə diqqətdə olub, amma indi daha sistemli yanaşma formalaşır”, – deyə o əlavə edib.
R.Cabarov bildirib ki, AKTA bu sahədə birbaşa bütün uşaqlarla deyil, onları maarifləndirəcək əsas qruplarla işləməyi daha effektiv hesab edir. Bu məqsədlə Təhsil Nazirliyi ilə birgə məktəblərdə informatika müəllimlərinin kibertəhlükəsizlik sahəsində biliklərinin artırılması üzrə layihə həyata keçirilir.
“İnformatika müəllimləri üçün xüsusi təlim materialları hazırlanır. Bu materiallar vasitəsilə onlar uşaqlara internetdə təhlükəsiz davranış qaydalarını, hansı addımların doğru, hansılarının riskli olduğunu izah edəcəklər. Hesab edirik ki, bu daha məntiqli və effektiv yanaşmadır. Valideynlər də bu məsələyə diqqət yetirməlidirlər. Lakin biz valideynləri buna məcbur edə bilmərik. Əsas məqsəd uşağın özündə düzgün rəqəmsal davranış vərdişlərinin formalaşdırılmasıdır”, – deyə R.Cabarov bildirib.
AKTA rəsmisi ümidvar olduğunu bildirib ki, gələn il həyata keçirilən layihələrin real nəticələri daha aydın görünəcək və uşaqların kibertəhlükəsizliyi sahəsində ciddi irəliləyiş əldə olunacaq.
Bölmənin digər xəbərləri
