Aktotı Raimkulova AMEA-da Türk dünyası ilə bağlı aparılan tədqiqatları yüksək qiymətləndirib
Bakı, 20 fevral, AZƏRTAC
Türk dünyasının görkəmli elm və incəsənət xadimləri haqqında AMEA tərəfindən nəşr olunmuş kitablardan böyük və zəngin bir kitabxana yaratmaq mümkündür.
AZƏRTAC xəbər verir ki, bu sözləri fevralın 20-də keçirilən AMEA-nın Ümumi yığıncağında Beynəlxalq Türk Mədəniyyəti və İrsi Fondunun prezidenti Aktotı Raimkulova deyib.
AMEA-nın Beynəlxalq Türk Mədəniyyəti və İrsi Fondunun mühüm tərəfdaşlarından biri olduğunu vurğulayan Aktotı Raimkulova akademiya ilə birgə müxtəlif konfrans və seminarların keçirildiyini söyləyib.
O, Parisdə UNESCO çərçivəsində Türk dünyasının ilk ensiklopedik əsəri “Divanü-lüğat-it-türk” kitabının təqdimatına görə AMEA rəhbərliyinə minnətdarlığını bildirib. Qeyd edib ki, bu gün Beynəlxalq Türk Mədəniyyəti və İrsi Fondu AMEA ilə birlikdə 1926-cı ildə Bakıda keçirilən Birinci Türkoloji Qurultayın 100 illiyinin yüksək səviyyədə keçirilməsi üçün hazırlıq işləri görür.
Aktotı Raimkulova əməkdaşlıq perspektivləri, aşıq sənətinə dair təşkil olunacaq beynəlxalq elmi konfrans haqqında danışıb, Azərbaycan alimlərini bu konfransda fəal iştirak etməyə çağırıb.
Azərbaycan, Türkiyə, Özbəkistan, Qırğızıstan, Qazaxıstan və Türkmənistan alimlərinin sıx əməkdaşlığı sayəsində qarşılıqlı əlaqələrin gücləndirilməsi və inkişafına, bundan sonra da mədəni və elmi təşəbbüslərin genişlənəcəyinə inamını bildirib, alimlərə uğurlar arzulayıb.
Bölmənin digər xəbərləri
