Almaniya Kansleri: Yeni təhlükəsizlik arxitekturası yaratmaq üçün fundamental və tarixi vəzifələrlə üz-üzəyik
Berlin, 8 sentyabr, AZƏRTAC
Bütün əlamətlər göstərir ki, Prezident Vladimir Putinin imperialist planı yalnız Ukraynanı işğal etməklə bitməyəcək, əksinə, bu, yalnız başlanğıcdır.
AZƏRTAC xəbər verir ki, bunu Almaniyanın Kansleri Fridrix Merts Berlin Xarici İşlər Nazirliyində keçirilən səfirlər konfransının açılış mərasimində deyib.
Kansler qeyd edib ki, Rusiyanın infrastruktura qarşı hibrid hücumlarının artan intensivliyi və aqressivliyi fonunda Ukrayna Avropadakı azadlığı da qoruyur. On gün əvvəl Kiyevə edilən hücum zamanı Avropa İttifaqının nümayəndəliyinin binasına zərər dəyməsini xatırladan Kansler qeyd edib ki, qaydalar üzərində qurulmuş Avropa sülh arxitekturası Moskva tərəfindən zorakılıqla pozulub.
“Biz indi yeni təhlükəsizlik arxitekturası yaratmaq üçün çox fundamental, demək olar ki, tarixi vəzifələr qarşısındayıq”, - deyə Merts bildirib.
Qeyd edək ki, konfransa Almaniyanın xarici ölkələrdəki 225 diplomatik nümayəndəliyinin rəhbərləri ilə yanaşı, Berlində akkreditə olunmuş diplomatik korpusun üzvləri də qatılıb.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
