Almaniya Prezidentinin Latın Amerikasına yeddigünlük səfəri başlayır
Berlin, 28 fevral, AZƏRTAC
Almaniya Prezidenti Frank-Valter Ştaynmayer fevralın 28-də Latın Amerikası regionuna yeddigünlük səfəri başlayır.
AZƏRTAC Almaniya Prezidentinin rəsmi səhifəsinə istinadla xəbər verir ki, martın 6-dək davam edəcək səfər Uruqvaydan başlayacaq. Prezident Frank-Valter Ştaynmayer və xanımı Elke Büdenbender martın 2-dək bu ölkədə səfərdə olacaqlar. Səfər çərçivəsində dövlət başçısı Uruqvay Prezidenti Yamandu Orsinin vəzifəyə başlaması mərasimində və rəsmi qəbulda iştirak edəcək. Ertəsi gün isə dövlət başçılarının görüşü nəzərdə tutulub.
Martın 2-də Paraqvaya səfər edəcək Almaniya Prezidenti bu ölkə üzrə ekspertlərlə görüşəcək, Milli Qəhrəmanlar Panteonunu ziyarət edəcək. Sonra rəsmi qarşılanma mərasimi, Paraqvay Prezidenti Pena Palasios ilə görüş və birgə mətbuat konfransı təşkil olunacaq. Dövlət başçısına UNESCO-nun mədəni irs siyahısına daxil olan Quarania musiqisi də təqdim ediləcək.
Almaniya Prezidentinin regiona səfəri Çili ilə yekunlaşacaq. Daha məhsuldar olacaq bu səfər çərçivəsində martın 4-də Çilidə vətəndaş cəmiyyətinin nümayəndələri ilə görüş, ikitərəfli iqtisadi əlaqələrə dair dəyirmi masanın açılışı, Santyaqoda Alman Məktəbi, eləcə də Xatirə və İnsan Haqları Muzeyi ilə tanışlıq da nəzərdə tutulur. Səfərin növbəti günündə isə Çili Prezidenti tərəfindən rəsmi qarşılanma mərasimi, ikitərəfli görüşlər, mətbuat konfransı və ziyafət təşkil olunacaq. Almaniya Prezidentinin regiona səfəri martın 6-da “Son dərəcə Böyük Teleskop” kompleksinin tikintisi və “Çox Böyük Teleskop” kompleksi ilə tanışlıqla başa çatacaq. Həmin gün dövlət başçısı Berlinə yola düşəcək.
AZƏRTAC-ın xüsusi müxbiri
Berlin
Bölmənin digər xəbərləri
