Almaniya silahlı qüvvələrində xidmət etmək istəyənlərin sayı artır
Berlin, 18 aprel, AZƏRTAC
Almaniya silahlı qüvvələrində (Bundesver) xidmət üçün müraciət edənlərin sayında ötən il artım müşahidə olunub.
AZƏRTAC “Tagesschau” xəbər xidmətinə istinadla bildirir ki, ötən il ümumilikdə 52,1 min nəfər xidmət üçün Bundesverə müraciət edib. Bu rəqəm 2023-cü illə müqayisədə 18,5 faiz çoxdur. Müraciət edənlərin 8200-ü qadındır ki, bu da 2023-cü illə müqayisədə 14 faiz çoxdur.
Bundesverə müraciətlərin artmasında əsas amillərdən biri sosial şəbəkələr vasitəsilə aparılan kampaniyalar və regionlarda təşkil olunan işə qəbul tədbirləridir. Lakin müraciətlərdəki artım Bundesverdə xidmət edən hərbçilərin ümumi sayına təsir göstərməyib. Əksinə, ötən illə müqayisədə 340 nəfər azalma qeydə alınıb. 2023-cü ildə hərbi xidmətdən təxminən 20 min nəfər ayrılıb. Buna baxmayaraq, son illərdə könüllü hərbi xidmətə maraq davamlı olaraq artır.
Bundesverin şəxsi heyəti hazırda 183 min hərbçi və 81 min mülki əməkdaşdan ibarətdir. 2031-ci ilə qədər bu rəqəmin 203 minə çatdırılması nəzərdə tutulur.
Qeyd edək ki, Almaniyada bu il ərzində yeni hərbi xidmət modelinin həyata keçirilməsi planlaşdırılır. Xristian Demokrat İttifaqı/Xristian Sosialist İttifaqı (CDU/CSU) ilə Sosial Demokrat Partiyasının (SPD) elan etdiyi koalisiya müqaviləsində İsveç nümunəsinə əsaslanan yeni hərbi xidmət modeli əksini tapıb. İlk mərhələdə könüllülük prinsipi əsasında tətbiq ediləcək bu modelə əsasən, 18 yaşdan yuxarı kişilər anket dolduracaqlar. Daha sonra Bundesver uyğun namizədlərlə əlaqə saxlayaraq, onların həqiqi hərbi xidmətdə iştirak etmək istəyib-istəmədiklərini soruşacaq.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
