Almaniya XİN-in başçısı: Türkiyənin müdafiə potensialının artırılması Berlinin maraqlarına uyğundur
Ankara, 17 oktyabr, AZƏRTAC
Türkiyə Silahlı Qüvvələrinin təhdid və çağırışların qarşısını almaq üçün potensialının artırılması Berlinin maraqlarına uyğundur.
AZƏRTAC xəbər verir ki, bu barədə Almaniyanın xarici işlər naziri Yohan Vadeful Türkiyənin “Hürriyyət” qəzetinə müsahibəsində bildirib.
Almaniyanın xarici işlər naziri bu gün Ankaraya səfəri öncəsi nəşrin suallarını cavablandırıb və burada digər məsələlərlə yanaşı, Türkiyəyə “Eurofighter” qırıcı təyyarələrinin tədarükü məsələsini də müzakirə edəcək.
“İnanıram ki, əməkdaşlıq ölkələrimiz üçün böyük imkanlar açır. Biz NATO üzrə müttəfiqimiz Ankaranın “Eurofighter” təyyarələrinin tədarükü yolu ilə öz çəkindirmə potensialını artırmaq səylərini dəstəkləmək qərarına gəldik, çünki bu, Almaniyanın maraqlarına uyğundur. Müqavilənin detalları müzakirə olunur”, - deyə o bildirib.
Vadeful Türkiyəni Almaniyanın Şimali Atlantika Alyansındakı “strateji tərəfdaşı” adlandırıb. Ankara daha əvvəl Almaniya şirkətləri ilə birlikdə Böyük Britaniya, İtaliya və İspaniya konqlomeratının da daxil olduğu Avropa təyyarə istehsalı konsorsiumu tərəfindən hazırlanmış 40 ədəd “Eurofighter Typhoon” təyyarəsini almaqda maraqlı olduğunu bildirib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
