Almaniyada casusluqda şübhəli bilinən sabiq deputat köməkçisinə hökm oxunub
Berlin, 30 sentyabr, AZƏRTAC
Almaniyada məhkəmə sabiq deputat Maksimilian Krahnın köməkçisi işləmiş çinli Cian Q.-ni Çinin lehinə casusluqda təqsirli hesab edərək, dörd il doqquz aylıq həbs cəzasına məhkum olunması barədə hökm çıxarıb.
AZƏRTAC “Tagesschau” xəbər xidmətinə istinadla bildirir ki, Cian Q. 2019-2024-cü illərdə Almaniya üçün Alternativ (AfD) partiyasından sabiq deputatın Avropa Parlamentindəki ofisində işləyərkən məlumat toplayaraq bəzi gizli sənədləri Çin tərəfinə ötürməkdə, AfD rəhbərliyinin şəxsi məlumatlarını toplamaqda və çinli dissidentləri izləməkdə təqsirli bilinib.
Eyni proses çərçivəsində Cian Q.-nin şübhəli tərəfdaşı Yaqi X.-yə də hökm oxunub. O, Leyptsiq hava limanında işlədiyi logistik şirkət vasitəsilə yüklər, uçuşlar və sərnişinlər barədə məlumatları ötürməkdə təqsirli bilinərək, 1 il 9 ay müddətinə şərti qaydada azadlıqdan məhrum edilib.
Maksimilian Kraha qarşı da prokurorluq tərəfindən ayrıca istintaq aparılır. O, Çinlə bağlı ödənişlər kontekstində rüşvət alma və çirkli pulların yuyulmasında şübhəli bilinir.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
