Almaniyada dəri xərçəngi xəstələrinin sayı kəskin artıb
Berlin, 14 may, AZƏRTAC
Almaniyada dəri xərçəngi diaqnozu ilə xəstəxanada müalicə alanların sayı son 20 ildə təxminən iki dəfə artıb.
AZƏRTAC xəbər verir ki, Almaniya Statistika İdarəsinin hesabatına əsasən, 2023-cü ildə 116 min 900 nəfər bu xəstəliklə əlaqədar stasionar müalicə alıb. Bu göstərici 2003-cü ildə qeyd alınmış 62 min nəfərlə müqayisədə 88 faiz çoxdur. Xüsusilə açıq dəri xərçəngi hallarında ciddi artım qeydə alınıb. 2003-cü ildə 41,9 min olan bu göstərici iyirmi il sonra 91 minə çatıb. Melanom səbəbilə stasionar müalicə alanların sayı isə 26 minə çatıb ki, bu da 2003-cü illə müqayisədə 27 faiz çoxdur.
Mütəxəssislər bu artımın əsas səbəbi kimi əhalinin yaşlanmasını göstərirlər. Bunun bəzi hallarda 1970–1980-ci illərdə günəşə nəzarətsiz məruz qalmanın nəticəsidir. Səbəblərdən biri də erkən diaqnostika imkanlarının artmasıdır. Belə ki, 2008-ci ildən etibarən 35 yaşdan yuxarı sığortalılar üçün dəri xərçənginin erkən aşkarlanması proqramı mövcuddur.
2023-cü ildə Almaniyada təxminən 4500 nəfər dəri xərçəngi nəticəsində həyatını itirib ki, bu da 2003-cü illə müqayisədə 60,8 faiz artım deməkdir. Ölənlərin 52,8 faizi 80 yaşdan yuxarı şəxslər olub. Bununla yanaşı, 30–34 yaşlı şəxslər arasında da ölüm riski nisbətən yüksəkdir. Belə ki, bu yaş qrupundakı ölüm hallarının bir faizi dəri xərçəngi səbəbindən baş verib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
