Almaniyada inflyasiya səviyyəsi may ayında sabit qalıb
Berlin, 30 may, AZƏRTAC
Almaniyada istehlak qiymətləri indeksi may ayında əvvəlki ayla müqayisədə dəyişməyərək illik 2,1 faiz səviyyəsində qalıb.
AZƏRTAC “Tagesschau” xəbər xidmətinə istinadla bildirir ki, bu barədə Federal Statistika İdarəsi məlumat yayıb.
Əsas inflyasiya amilləri ərzaq məhsulları və xidmətlər olub. Ərzaq məhsullarının qiyməti ötən ilin eyni dövrü ilə müqayisədə 2,8 faiz artıb. Xidmətlərdə isə qiymət artımı 3,4 faiz təşkil edib ki, bu da bir ay əvvəlki 3,9 faizlə müqayisədə cüzi azalmadır. Əmtəə məhsullarında qiymətlər 0,9 faiz yüksəlib. Əvəzində enerji daşıyıcılarının qiymətində nəzərəçarpacaq ucuzlaşma qeydə alınıb. May ayında enerji xərcləri ötən illə müqayisədə 4,6 faiz azalıb. Bu isə dünya bazarında neftin ucuzlaşması ilə izah olunur.
İqtisadçılar inflyasiyanın əsas baza göstəricisi olan 2,8 faizə enməsini diqqətlə izləyirlər. Bu göstərici hələ də Avropa Mərkəzi Bankının müəyyən etdiyi 2 faiz hədəfini aşır.
Maliyyə analitikləri yaxın günlərdə Avropa Mərkəzi Bankının faiz dərəcələrini bir daha azaldacağını proqnozlaşdırırlar. Artıq ardıcıl yeddi dəfə uçot dərəcəsi endirilsə də, iqtisadi fəallıq zəif olaraq qalır. İqtisadçılar inflyasiyanın tam nəzarətə alınması üçün iqtisadiyyatın canlanmasının vacib olduğunu bildirirlər.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
