Almaniyada meşə yanğınları ilə əlaqədar bir neçə əyalətdə fövqəladə vəziyyət elan edilib
Berlin, 3 iyul, AZƏRTAC
Almaniyada davam edən quraqlıq fonunda bir neçə əyalətdə genişmiqyaslı meşə yanğınları baş verib. Saksoniya, Brandenburq, Bavariya, Türingen və Saksoniya-Anhalt əyalətlərində yanğınsöndürmə briqadaları yanğınların qarşısının alınması üçün fasiləsiz mübarizə aparır.
AZƏRTAC yerli mediaya istinadla xəbər verir ki, Saksoniyada keçmiş hərbi təlim poliqonunun ərazisində başlayan yanğın genişlənərək qonşu Brandenburq ərazisinə keçib.
Yanğının söndürülməsi üçün 200-dən çox xilasedici cəlb olunub, onlarla sakin təxliyə edilib. Vəziyyətin gərginləşməsi ilə əlaqədar bölgədə fövqəladə vəziyyət elan olunub. Təbiət qoruğu olan bu ərazidə nadir quş növləri məskunlaşıb. Səhər saatlarında Brandenburq ərazisində vəziyyət nisbətən sabitləşsə də, təhlükə tam sovuşmayıb.
Bundan başqa, Türingen əyalətinin Saalfelder Höhe bölgəsində 250 hektara yaxın meşə sahəsi yanıb. Bölgədə fövqəladə vəziyyət elan olunub, əlavə 100 xilasedici cəlb edilib, əhaliyə xəbərdarlıq olunub.
Saksoniya-Anhalt əyalətinin Quedlinburq şəhəri yaxınlığında 5 min kvadratmetrlik meşə sahəsində baş vermiş yanğın isə artıq söndürülüb. Oberpfalts bölgəsindəki meşədə baş verən yanğın polis və yanğınsöndürmə qüvvələrinin müdaxiləsi ilə nəzarət altına alınıb. Təxminən 3 min kvadratmetrlik sahədə baş vermiş yanğının söndürülməsinə iki polis helikopteri də cəlb olunub. Regionda kiçikmiqyaslı daha səkkiz yanğın qeydə alınıb.
Almaniya Meteorologiya Xidməti (DWD) ölkənin şərqində yüksək yanğın təhlükəsi barədə əhaliyə xəbərdarlıq edib. Həftəsonu bu riskin cənub-qərb bölgələrdə də artacağı gözlənilir.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
