Almaniyada minlərlə insan Pasxa yürüşlərində sülh tələbi ilə nümayişlər keçirib
Berlin, 20 aprel, AZƏRTAC
Almaniyanın müxtəlif şəhərlərində ənənəvi Pasxa yürüşləri keçirilib. Minlərlə insan küçələrə çıxaraq sülh, silahsızlaşdırma və diplomatiya çağırışları ilə hökumətə müraciət ediblər.
AZƏRTAC “Tagesschau” xəbər xidmətinə istinadla bildirir ki, ölkə üzrə keçirilən təxminən 70 aksiyaya minlərlə insan qatılıb. İlk yürüşlər səhər saatlarında Duysburq, Maynts, Volfsburq və Şverin şəhərlərində start götürüb. Bazar ertəsinə qədər davam edəcək bayram çərçivəsində Berlin, Bremen, Münxen, Leyptsiq və Ştutqart da daxil olmaqla, bir sıra şəhərlərdə 110-dan çox nümayiş, mitinq, veloyürüş və digər aksiyaların təşkili planlaşdırılır.
Builki yürüşlərdə əsas tələblərdən biri Almaniyada hərbi potensialın artırılmasına qarşı çıxmaq və hökumətdən ölkənin “müharibəyə hazırlıqlı” deyil, “sülhə qadir” olmasını təmin etməklə bağlı konkret addımlar atmaqdır. Bu il Pasxa yürüşlərinin iştirakçıları əsasən Rusiya-Ukrayna müharibəsi, Qəzza zolağında yaşanan gərginlik və ABŞ-ın Almaniyaya ortamənzilli raketlər yerləşdirmək istəyinə qarşı etirazlar səsləndiriblər.
Almaniyada Pasxa yürüşləri 1960-cı illərdən bəri keçirilir. Ən genişmiqyaslı aksiyalar “Soyuq müharibə” dövründə - 1980-ci illərdə baş tutub. Həmin vaxt yürüşlərdə yüz minlərlə insan iştirak edib. Pandemiya dövründə aksiyalara qoyulan məhdudiyyətlər, Rusiya-Ukrayna müharibəsinin başlamasından sonra sülh hərəkatı daxilində yaranan fikir ayrılıqları son illərdə iştirakçıların sayının azalmasına səbəb olub.
AZƏRTAC-ın xüsusi müxbiri
Berlin
Bölmənin digər xəbərləri
