Almaniyada növbəti dövlət başçısının qadın olması müzakirə edilir
Berlin, 21 aprel, AZƏRTAC
Almaniyada siyasi partiyalar arasında 2027-ci ildə keçiriləcək federal prezident seçkilərində qadın namizədlə bağlı ilkin müzakirələr başlayıb.
AZƏRTAC “Welt” televiziyasına istinadla xəbər verir ki, Sosial Demokrat Partiyası (SPD) və Xristian Demokrat İttifaqı (CDU) ölkə tarixində ilk dəfə olaraq qadın dövlət başçısının seçilməsini təklif ediblər.
Reynland-Pfalts əyalətinin Baş naziri, SPD-nin üzvü Aleksander Şvaytser qadın prezidentin gender bərabərliyi baxımından mühüm siqnal olacağını vurğulayıb. SPD qadınlar birliyinin sədri Mariya Noyxl isə “on iki kişidən sonra artıq bir qadının prezident olmasının vaxtıdır” fikrini səsləndirib. O, SPD-li qadınların bu məqsəd uğrunda mübarizə aparacaqlarını da vurğulayıb.
Birlik blokunda yer alan Xristian Sosialistlər İttifaqının (CSU) qadınlar ittifaqının rəhbəri Ulrike Şarf və CDU-nun Aşağı Saksoniyadakı nümayəndəsi Marayke Vulf da bu təşəbbüsə dəstək veriblər. Onların fikrincə, Almaniyada dövlət başçısı üçün lazım olan keyfiyyətlərə malik kifayət qədər qadın mövcuddur. M.Vulf bu yüksək vəzifəyə ilk dəfə bir qadının seçilməsinin çox güclü siqnal ola biləcəyini vurğulayaraq, bunun vaxtının çatdığını ifadə edib, partiyaları cəsarətli və gələcəyə yönəlik təkliflər verməyə çağırıb.
Xatırladaq ki, hazırkı Prezident Frank-Valter Ştaynmayerin ikinci prezidentlik müddəti 2027-ci ildə başa çatacaq. Qanunvericiliyə əsasən, o, yenidən namizəd ola bilməz.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
