Almaniyada qaçqınlar üçün daha bir düşərgədə yanğın baş verib
Berlin, 14 yanvar, AZƏRTAC
Yanvarın 14-nə keçən gecə Almaniyada qaçqınlar üçün daha bir düşərgədə yanğın baş verib.
AZƏRTAC xəbər verir ki, hadisə AFR-də sığınacaq axtaranlar üçün Bavariya federal əyalətinin Dornax şəhərində yerləşən düşərgədə qeydə alınıb. Alman dilində ləhcəsiz danışan naməlum şəxs yanğınsöndürmə komandasının növbətçisinə zəng vuraraq düşərgədəki 7 taxta yaşayış evində yanğın baş verdiyini bildirib.
Yanğınsöndürənlər hadisə yerinə gələnə qədər həmin evlər tamamilə yanıb. Bir nəfər qaçqın yanğından zərər çəkib, 40 nəfər təhlükəsiz məsafəyə təxliyə edilib.
Münhen polisi cinayət işi qaldırıb, təhqiqat aparılır. Yanğının qəsdən törədilməsi versiyası istisna olunmur. Məsələ burasındadır ki, son günlər həmin regionda ultrasağçı qüvvələrin nümayişləri keçirilirdi.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
