Almaniyada sərnişin qatarının qəzaya uğraması nəticəsində azı dörd nəfər həlak olub
Berlin, 28 iyul, AZƏRTAC
“Alman Dəmir Yolları” (Deutsche Bahn) şirkətinə məxsus qatarın iyulun 27-də axşam saatlarında Baden-Vürttemberq əyalətində qəzaya uğraması nəticəsində azı dörd nəfər həlak olub.
AZƏRTAC xəbər verir ki, “Bild” qəzetinin yaydığı məlumatda hadisə nəticəsində 3 nəfərin həlak olduğu, 34 nəfərin xəsarət aldığı qeyd edilib. Qəza nəticəsində qatarın iki vaqonu relsdən çıxaraq meşəlik əraziyə aşıb. Ölən və xəsarət alanların sayı dəqiqləşdirilir.
İçərisində təxminən yüz sərnişinin olduğu qatar Ulm şəhəri istiqamətində hərəkətdə olarkən Biberax şəhəri yaxınlığında qəzaya uğrayıb. Hadisə yerinə polis, yanğınsöndürən və təcili yardım briqadaları, o cümlədən 6 helikopter cəlb olunub.
Qəzanın səbəbləri araşdırılır. Hadisənin torpaq sürüşməsi nəticəsində baş verdiyi bildirilir. İlkin məlumata görə, sürüşmə nəticəsində relslərin üzərinə düşən torpaq və daşlar sürətlə hərəkət edən qatarın relsdən çıxmasına səbəb olub. Hadisədən əvvəl bölgədə güclü qasırğa baş verib.
Almaniya Kansleri Fridrix Merts X hesabındakı səhifəsində paylaşım edərək, hadisədən sarsıldığını, daxili işlər və nəqliyyat nazirləri ilə sıx əlaqədə olduğunu bildirib, həlak olanların yaxınlarına başsağlığı verib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
